യുവാവിനെ ബന്ദിയാക്കി ഭാര്യയെയും മകളെയും ലൈംഗികമായി പീഡിപ്പിച്ചു; ആറംഗ സംഘത്തെ പൊലീസ് തെരയുന്നു

ഭോപ്പാൽ: ഭർത്താവിനെ ബന്ദിയാക്കി ഭാര്യയെയും മകളെയും ആറംഗ സംഘം കൂട്ടബലാത്സംഗത്തിന് ഇരയാക്കിയതായി പരാതി. മധ്യപ്രദേശിലെ ബുർഹാൻപൂർ ജില്ലയിലെ ഷാപൂർ ഗ്രാമത്തിലാണ് സംഭവം. ഭർത്താവിനെ ബന്ദിയാക്കിയശേഷം 40 കാരിയായ സ്ത്രീയെയും 12 വയസുള്ള മകളെയുമാണ് ആറ് പേർ തട്ടിക്കൊണ്ടുപോയി കൂട്ടബലാത്സംഗത്തിനിരയാക്കിയതെന്ന് പോലീസ് പറഞ്ഞു.

പരാതിയിൽ പറയുന്നതനുസരിച്ച്, ആയുധധാരികളായ ആറ് പേർ, യുവതിയുടെ ഭർത്താവിനെ ബന്ദിയാക്കി, ഭാര്യയെയും മകളെയും തട്ടിക്കൊണ്ടുപോകുകയായിരുന്നു. വീട്ടിലെ പൂട്ടുതകർത്ത് അകത്തുകടന്ന സംഘം ഭർത്താവിനെ ഒരു മുറിയിൽ പൂട്ടിയിട്ടശേഷമാണ് യുവതിയെയും മകളെയും തട്ടിക്കൊണ്ടുപോയത്. വെള്ളിയാഴ്ച രാത്രിയായിരുന്നു സംഭവം.

ഇവരെ വീടിനടുതതു ആളൊഴിഞ്ഞ ഭാഗത്തുള്ള പാടത്തിൽകൊണ്ടുവന്നു കൂട്ടബലാത്സംഗത്തിന് ഇരയാക്കുകയായിരുന്നുവെന്ന് ഡെപ്യൂട്ടി ഇൻസ്പെക്ടർ ജനറൽ (ഖാർഗോൺ റേഞ്ച്) തിലക് സിംഗ് പറഞ്ഞു.

മഹാരാഷ്ട്ര അതിർത്തിയിലെ ബോദാർലി ഗ്രാമത്തിലാണ് സംഭവം. പ്രതികൾ വീട്ടിൽ നിന്ന് പണവും മൊബൈൽ ഫോണും കൊള്ളയടിച്ചു.

കുറ്റവാളികളെ പിടികൂടാനായി പോലീസ് സംഘങ്ങളെ അയൽ സംസ്ഥാനത്തെ ബുൾദാന, ജൽഗാവ് എന്നിവിടങ്ങളിലേക്ക് അയച്ചിട്ടുണ്ടെന്നും ഡിഐജി അറിയിച്ചു.

376 ഡി (കൂട്ട ബലാത്സംഗം), 347 (അന്യായമായി തടവിൽ പാർപ്പിക്കുക), 363 (തട്ടിക്കൊണ്ടുപോകൽ), ലൈംഗിക കുറ്റകൃത്യങ്ങളിൽ നിന്ന് കുട്ടികളെ സംരക്ഷിക്കുന്നതിനുള്ള (പോക്സോ) നിയമം എന്നിവപ്രകാരം കേസെടുത്തിട്ടുണ്ടെന്ന് ഷാപൂർ പോലീസ് സ്റ്റേഷൻ ചുമതലയുള്ള സഞ്ജയ് പഥക് പറഞ്ഞു.