കെവൈസി അപ്ഡ‍േറ്റ് ചെയ്യാൻ വന്ന ലിങ്കില്‍ ക്ലിക്ക് ചെയ്തു; നടി നഗ്മയുടെ അക്കൗണ്ടിൽ നിന്ന് ഒരു ലക്ഷം രൂപ നഷ്ടമായി

ഓൺലൈൻ സാമ്പത്തിക തട്ടിപ്പിന് ഇരയായതായി നടിയും കോൺഗ്രസ് നേതാവുമായ നഗ്മ. ഒരു ലക്ഷം രൂപയാണ് നഷ്ടമായത്. ബാങ്ക് അക്കൗണ്ടുമായി ബന്ധപ്പെട്ട വ്യക്തിഗത വിവരങ്ങൾ അപ്ഡേറ്റ് ചെയ്യനായി വന്ന എസ്എംഎസിലെ ലിങ്കിൽ ക്ലിക്ക് ചെയ്തതോടെയാണ് തട്ടിപ്പിന് ഇരയായതെന്ന് നടി പറഞ്ഞു.

സാധാരണ ബാങ്കിൽ നിന്ന് അയക്കുന്ന സന്ദേശം പോലെയാണ് എസ്എംഎസ് വന്നത്. ലിങ്കിൽ ക്ലിക്ക് ചെയ്തതോടെ ഒരാൾ തന്നെ ഫോൺ വിളിച്ചു. കെവൈ‌സി അപ്‌ഡേറ്റ് പൂർത്തിയാക്കാൻ സഹായിക്കാമെന്ന് പറഞ്ഞാണ് ഇയാൾ ബന്ധപ്പെട്ടത്. തുടർന്ന് മെബൈൽ അവരുടെ നിയന്ത്രണത്തിലാക്കി- നഗ്മ പറഞ്ഞു.

നെറ്റ്ബാങ്ക് അക്കൗണ്ട് ലോഗിൻ ചെയ്താണ് തട്ടിപ്പുകാർ ഒരു ലക്ഷം രൂപ ട്രാൻസ്ഫർ ചെയ്തത്. 20 ഓളം തവണ ഒടിപി വന്നെങ്കിലും അത് ഷെയർ ചെയ്തിട്ടില്ല. ഭാഗ്യവശാൽ അധികം പണം നഷ്ടമായിട്ടില്ലെന്നും താരം കൂട്ടിച്ചേർത്തു.

ഫെബ്രുവരി 28നാണ് നഗ്മയ്ക്ക് 99,998 രൂപ അക്കൗണ്ടിൽ നിന്ന് നഷ്ടമായത്. അടുത്തിടെ നഗ്മ ഉൾപ്പെടെ എൺപതോളം പേർക്കാണ് സമാന തട്ടിപ്പിലൂടെ പണം നഷ്ടമായത്.

തെന്നിന്ത്യയിൽ നിരവധി ഹിറ്റുകളിലൂടെ ശ്രദ്ധേയായ നടിയാണ് നഗ്മ. 1990ൽ സൽമാന്‍ ഖാനൊപ്പം ബാഗിയിലൂടെ ബോളിവുഡിലും അരങ്ങേറി. 2004ൽ കോൺഗ്രസിൽ ചേർന്ന നഗ്മ ആന്ധ്രാപ്രദേശിൽ പ്രചാരണ രംഗത്ത് സജീവമായിരുന്നു. 2004ല്‍ മീററ്റിൽ നിന്ന് കോണ്‍ഗ്രസ് സ്ഥാനാര്‍ത്ഥിയായി ലോക്സഭയിലേക്ക് മത്സരിച്ചു. 2015ൽ ദേശീയ മഹിളാകോണ്‍ഗ്രസ് സെക്രട്ടറിയായി.