കൊച്ചിയിലെ ലോഡ്ജിൽ മൂന്നു പേരുടെ മ‍ൃതദേഹം; ആത്മഹത്യ ചെയ്തത് അമ്മയും മക്കളും

എറണാകുളത്ത് ലോഡ്ജിൽ മൂന്നു പേരുടെ മൃതദേഹം കണ്ടെത്തി. ബംഗളൂരു സ്വദേശികളായ രാധാമണി, സുരേഷ് കുമാർ, സന്തോഷ് കുമാർ എന്നിവരെയാണ് മരിച്ചനിലയിൽ കണ്ടെത്തിയത്.

ഇവർ അമ്മയും മക്കളുമാണെന്നാണ് ലോഡ്ജിലുള്ളവർ പറയുന്നത്. ആത്മഹത്യയാണെന്നാണ് പൊലീസിന്റെ പ്രാഥമിക നിഗമനം.

സൗത്ത് റെയിൽവേ സ്റ്റേഷനു സമീപത്തെ ലോഡ്ജിലാണ് മൃതദേഹം കണ്ടെത്തിയിരിക്കുന്നത്. മൃതദേഹങ്ങൾക്ക് രണ്ടു ദിവസത്തെ പഴക്കമുണ്ടെന്നാണ് പൊലീസ് പറയുന്നത്.

14നാണ് ഇവർ ലോഡ്ജിൽ മുറിയെടുത്തത്. 17വരെ ഇവരെ ലോഡ്ജിൽ കണ്ടിരുന്നു. ഇതിനുശേഷം ഇവരെകുറിച്ച് വിവരങ്ങളൊന്നും ലഭിക്കാതായതോടെയാണ് ലോഡ്ജ് ജീവനക്കാർ മുറി പരിശോധിച്ചത്.

വിഷക്കുപ്പിയടക്കം മുറിയിൽ നിന്ന് കണ്ടെടുത്തു. സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്. ചികിത്സയ്ക്കും മറ്റുമായി ഇവർ സ്ഥിരമായി കൊച്ചിയിൽ വരാറുണ്ടെന്നാണ് വിവരം.