'എന്നെ ട്രോളാൻ എനിക്ക് വേറാരുടേം സഹായം വേണ്ട'; തനിക്കെതിരായ ട്രോളുകള്‍ പങ്കുവെച്ച് ഹണി റോസ്

സമൂഹമാധ്യമങ്ങളില്‍ അടുത്തകാലത്തായി ഏറ്റവുമധികം ചര്‍ച്ച ചെയ്യപ്പെട്ട അഭിനേത്രിയാണ് ഹണി റോസ്. നായികയായും പ്രതിനായികയായും സിനിമയിലും സോഷ്യല്‍ മീഡിയയിലും സജീവമായ താരത്തിനെതിരെ നിരവധി വിമര്‍ശനങ്ങളും അടുത്തിടെ ഉയര്‍ന്നിരുന്നു.

സിനിമ അഭിനയത്തിനൊപ്പം കേരളത്തിലെ അങ്ങോളമിങ്ങോളമുള്ള വേദികളില്‍ ഉദ്ഘാടകയുടെ റോളിലും ഹണി റോസ് തിളങ്ങി നിന്ന വര്‍ഷമായിരുന്നു 2022. സോഷ്യല്‍ മീഡിയയില്‍ നിറഞ്ഞുനിന്ന ഹണി റോസിന്‍റെ ഉദ്ഘാടന ചിത്രങ്ങളെ ട്രോളാന്‍മാര്‍ കണക്കിന് കളിയാക്കി.

താരത്തിന്‍റെ വസ്ത്രധാരണത്തെയും ശരീരത്തെയും വിമര്‍ശിച്ച് വ്യാപക സൈബര്‍ ആക്രമണമാണ് ഹണി റോസ് നേരിട്ടിരുന്നത്. ഇപ്പോഴിതാ തനിക്കെതിരെ സമൂഹമാധ്യമങ്ങളില്‍ പ്രചരിച്ച ട്രോളുകള്‍ ഫേസ്ബുക്ക് പേജിലൂടെ പങ്കുവെച്ചിരിക്കുകയാണ് താരം

ഉദ്ഘാടന വേദികളിലെ സ്ഥിരം സാന്നിദ്ധ്യമായി മാറിയതിന് പിന്നാലെയാണ് ട്രോളന്മാരുടെ കണ്ണില്‍ ഹണി റോസ് ഉടക്കുന്നത്.

തനിക്കെതിരായ വിമര്‍ശനങ്ങളെ പോസിറ്റീവ് മൈന്‍ഡോടെ പങ്കുവെച്ച ഹണി റോസിനെ അഭിനന്ദിക്കാനും ആരാധകര്‍ മറന്നില്ല. 'സ്വയം ട്രോളുന്നു, അതും ഒരു സന്തോഷമല്ലേ..', എന്നാലും ട്രോളുകൾ accept ചെയ്യാൻ കാണിച്ച ആ മനസ്സ് , എന്തേലും ട്രോൾ കാണുമ്പോഴേക്കും കുരുപൊട്ടി ഒലിക്കുന്ന സെലിബ്രേറ്റികൾക്കിടയിൽ താങ്കൾ ഒരു റിയൽ സ്റ്റാർ ആണ്, ഇതാണ് സ്പോർട്സ് മാൻ സ്പിരിറ്റ്.. എന്നിങ്ങനെ പോകുന്നു ആരാധകരുടെ കമന്‍റുകള്‍

മലയാളത്തില്‍ മോഹന്‍ലാല്‍ അടക്കമുള്ള മുന്‍നിര നായകന്‍മാര്‍ക്കൊപ്പം നിരവധി സിനിമകളില്‍ അഭിനയിച്ച ഹണി റോസ് മറ്റ് ഭാഷകളിലേക്കും സജീവമാവുകയാണ്

പുതുവർഷത്തിൽ ഹണി റോസ് തെലുങ്ക് സിനിമ പ്രവേശം നടത്തുന്നു എന്ന വാര്‍ത്ത അടുത്തിടെ പുറത്തുവന്നിരുന്നു. നന്ദമുരി ബാലകൃഷ്ണ നായകനാവുന്ന ‘വീര സിംഹ റെഡ്‌ഡി’ എന്ന സിനിമയിലൂടെയാണ് ഹണി റോസിന്‍റെ തെലുങ്കിലേക്കുള്ള അരങ്ങേറ്റം

ചിത്രത്തിന്റെ പോസ്റ്റർ ഹണി ഇൻസ്റ്റഗ്രാമിൽ പോസ്റ്റ് ചെയ്‌തു. തകർപ്പൻ പാട്ടുകളിലൂടെ ഈ ചിത്രം സിനിമാ ലോകത്തെ സംസാരവിഷയമായി മാറിയിരിക്കുകയാണ്.

വിനയന്‍ സംവിധാനം ചെയ്ത ബോയ് ഫ്രണ്ട് എന്ന ചിത്രത്തിലൂടെയാണ് ഹണി റോസ് സിനിമാരംഗത്ത് എത്തുന്നത്