'ഞാന്‍ പ്രാര്‍ഥിച്ചതിനെല്ലാം അവള്‍ യെസ് പറഞ്ഞു' പരിണീതി ചോപ്ര- രാഘവ് ഛദ്ദ വിവാഹ നിശ്ചയ ചിത്രങ്ങള്‍

ബോളിവുഡ് താരസുന്ദരി പരിണീതി ചോപ്രയും (Parineeti Chopra) ആം ആദ്മി പാര്‍ട്ടി നേതാവ് രാഘവ് ഛദ്ദയും (Raghav Chadha ) തമ്മിലുള്ള വിവാഹ നിശ്ചയം നടന്നു. ഇരുവരും ഏറെ നാളുകളായി പ്രണയത്തിലായിരുന്നു എന്ന അഭ്യൂഹങ്ങള്‍ക്ക് വിരാമമിട്ടുകൊണ്ട് പരിണീതിയും രാഘവും തന്നെയാണ് നിശ്ചയത്തിന്‍റെ ചിത്രങ്ങള്‍ സോഷ്യല്‍ മീഡിയയില്‍ പങ്കുവെച്ചത്.

ഡൽഹി മുഖ്യമന്ത്രി അരവിന്ദ് കെജ്രിവാൾ, പഞ്ചാബ് മുഖ്യമന്ത്രി ഭ​ഗവന്ത് മൻ, പരിണീതിയുടെ ബന്ധുവും ഹോളിവുഡ് നടിയുമായ പ്രിയങ്ക ചോപ്ര അടക്കമുള്ള പ്രമുഖര്‍  ചടങ്ങിൽ പങ്കെടുത്തു.

''ഞാൻ പ്രാർഥിച്ചതിനെല്ലാം..... അവൾ യെസ് പറഞ്ഞു'' എന്ന ക്യാപ്ഷനോടെയാണ് രാഘവ് ചിത്രങ്ങൾ പങ്കുവെച്ചത്.

വിവാഹ നിശ്ചയ ചിത്രങ്ങള്‍ പുറത്തുവന്നതോടെ ഇരുവരും ചടങ്ങിന് ധരിച്ച വസ്ത്രങ്ങളെ ചുറ്റിപ്പറ്റിയുള്ള ചര്‍ച്ചകളും ആരംഭിച്ചു. പേസ്റ്റൽ നിറത്തിലുള്ള വസ്ത്രങ്ങളിൽ സിംപിൾ ലുക്കിലാണ് ഇരുവരും എത്തിയത്. എംബ്രോയ്ഡറി വർക്കുകൾക്ക് അപ്പുറം ആഡംബരമില്ലാത്ത വസ്ത്രമായിരുന്നു പരിണീതിയുടേത്. 

ബോളിവു‍ഡിലെ പ്രശസ്ത ഡിസൈനർ മനീഷ് മൽഹോത്രയാണ് പരിണീതിയുടെ വസ്ത്രം ഒരുക്കിയത്. ലളിതമായ ആഭരണങ്ങൾ പരിണീതിയുടെ ലുക്കിന് മാറ്റുകൂട്ടി.

ഇരുവരും ഡേറ്റിങ്ങിലാണെന്ന വാർത്തകൾ പുറത്തുവരുന്നതിനിടെ ഇരുവരും ഒരുമിച്ച് ഭക്ഷണം കഴിഞ്ഞിറങ്ങുന്ന വീഡിയോകളും ട്വിറ്ററില്‍ പ്രചരിച്ചിരുന്നു. ഐ.പി.എൽ. മത്സരത്തിന് ഇരുവരും ഒന്നിച്ചെത്തിയതിന്റെ വീഡിയോകൾ പുറത്തുവന്നിരുന്നു.