15 കോടിയും 30 കോടിയുമൊന്നും വാങ്ങിയില്ല; ജവാനിൽ അതിഥി വേഷത്തിലെ പ്രതിഫലത്തെ കുറിച്ച് ദീപിക പദുകോൺ

ഷാരൂഖ് ഖാൻ ചിത്രം ജവാനിൽ വെറും ഇരുപത് മിനുട്ട് മാത്രമായിരുന്നുവെങ്കിലും ഏറെ ശ്രദ്ധിക്കപ്പെട്ട വേഷമായിരുന്നു ദീപിക പദുകോണിന്റേത്.

ചിത്രത്തിൽ നായികയായ നയൻതാരയേക്കാൾ ഉയർന്ന പ്രതിഫലമാണ് ദീപിക വാങ്ങിയത് എന്ന് റിപ്പോർട്ടുകൾ ഉണ്ടായിരുന്നു. നയൻതാരയ്ക്ക് ജവാനിൽ ലഭിച്ച പ്രതിഫലം 10 കോടിയായിരുന്നു.

എന്നാൽ, അതിഥി വേഷത്തിലെത്തിയ ദീപികയുടെ പ്രതിഫലം 15 കോടിക്കും 30 കോടിക്കും ഇടയിലാണെന്നായിരുന്നു റിപ്പോർട്ടുകൾ. ഇപ്പോൾ ജവാനിലെ പ്രതിഫലത്തെ കുറിച്ച് ദീപിക തന്നെ വ്യക്തമാക്കിയിരിക്കുകയാണ്.

ഒരു രൂപ പോലും പ്രതിഫലം വാങ്ങാതെയാണ് ഷാരൂഖ് ഖാനൊപ്പം ദീപിക പദുകോൺ അഭിനയിച്ചത്. നടി തന്നെയാണ് ഇക്കാര്യം വെളിപ്പെടുത്തിയതും.

ചിത്രത്തിൽ ഡബിൾ റോളിൽ എത്തിയ ഷാരൂഖ് ഖാന്റെ അമ്മയുടെ വേഷമാണ് ദീപിക അവതരിപ്പിച്ചത്. നേരത്തേയും, സുപ്രധാനമായ അതിഥി വേഷങ്ങളിൽ ദീപിക പദുകോൺ അഭിനയിച്ചിരുന്നു.

റൺവീർ സിംഗിനൊപ്പം 83, സിർക്കസ് എന്നീ സിനിമകളിൽ അഭിനയിക്കാനും പ്രതിഫലം വാങ്ങിയിരുന്നില്ലെന്നും ദീപിക വെളിപ്പെടുത്തി.

ഭർത്താവിന്റെ വിജയത്തിൽ കരുത്തായി നിൽക്കുന്ന ഭാര്യയുടെ വേഷമായിരുന്നു 83 ലേത്. അത്തരമൊരു വേഷം ചെയ്യണമെന്ന് ആഗ്രഹിച്ചിരുന്നു. തന്റെ അമ്മ അങ്ങനെയൊരു സ്ത്രീയായിരുന്നു.

ഭർത്താവിന്റെ കരിയറിനു വേണ്ടി ത്യാഗം സഹിക്കുന്ന സ്ത്രീകള‍്ക്കുള്ള ആദരമായിട്ടാണ് 83 ലെ വേഷം ചെയ്തതെന്ന് ദീപിക പറയുന്നു. അതുപോലെ തന്നെയാണ് ഷാരൂഖ് ഖാനും.

ഷാരൂഖ് ഖാൻ ചിത്രത്തിൽ അതിഥി വേഷത്തിലെത്താൻ തനിക്ക് യാതൊരു മടിയുമില്ല. അതിന് പ്രതിഫലവും വാങ്ങില്ല. രോഹിത് ഷെട്ടിയോടും ഇതേ സമീപനമാണെന്നും ദീപിക പറയുന്നു.