രണ്ട് ദിവസം മുമ്പ് 'കങ്കുവ'യുടെ ഓ‍ഡിയോ ലോഞ്ചിൽ ചിരിച്ച് നിൽക്കുന്ന നിഷാദ്; വിശ്വസിക്കാനാകാതെ സിനിമാ ലോകം

മലയാള സിനിമാ ലോകത്തിന് വിശ്വസിക്കാനാകാത്ത വാർത്തയോടെയാണ് ഇന്ന് നേരം പുലർന്നത്. മലയാള സിനിമയിൽ തന്റെ കഴിവ് തെളിയിച്ച് തമിഴ് സിനിമാ ലോകത്തേക്ക് ചേക്കേറുന്നതിനിടെയാണ് ഫിലിം എഡിറ്റർ നിഷാദ് യൂസഫ് വിടവാങ്ങിയത്.

സൂര്യയുടെ സിനിമാ ജീവിതത്തിലെ പ്രധാനപ്പെട്ട സിനിമകളിലൊന്നായിരിക്കുമെന്ന് സിനിമാ ലോകം പ്രവചിക്കുന്ന കങ്കുവയുടെ എഡിറ്ററായിരുന്നു നിഷാദ്. രണ്ടു ദിവസം മുമ്പ് നടന്ന കങ്കുവയുടെ ഓഡിയോ ലോഞ്ചിനും നിഷാദ് പങ്കെടുത്തിരുന്നു. അന്ന് സൂര്യക്കൊപ്പം നിൽക്കുന്ന ചിത്രങ്ങളും നിഷാദ് തന്റെ സോഷ്യൽമീഡിയ അക്കൗണ്ടുകളിൽ പങ്കുവച്ചിരുന്നു.

കങ്കുവയിലൂടെ തന്റെ കരിയറിന്റെ ഉന്നതിയിലേക്ക് എത്തുന്നതിനിടയാണ് നിഷാദിന്റെ വിയോ​ഗം. നിഷാദ് എഡിറ്റ് ചെയ്ത് വരാനിരിക്കുന്ന ചിത്രങ്ങളെല്ലാം ആരാധകർ കാത്തിരിക്കുന്ന ചിത്രങ്ങളാണ്. മമ്മൂട്ടി നായകനായെത്തുന്ന ബസൂക്ക, ഖാലിദ് റഹ്മാൻ സിനിമയായ ജിംഖാന, മോഹൻലാൽ നായകനായെത്തുന്ന തരുൺ മൂർ‌‍ത്തി ചിത്രത്തിന്റെയും എഡിറ്റർ നിഷാദായിരുന്നു.

ബുധനാഴ്ച പുലർച്ചെയാണ് കൊച്ചിയിലെ ഫ്ലാറ്റിൽ മരിച്ച നിലയിൽ നിഷാദിനെ കണ്ടെത്തിയത്. ഹരിപ്പാട് സ്വദേശിയായ നിഷാദ് യൂസഫ് കൊച്ചിയില്‍ ഭാര്യയ്ക്കും രണ്ട് മക്കള്‍ക്കും ഒപ്പമാണ് കൊച്ചി പനമ്പള്ളി നഗറിലെ ഫ്ലാറ്റില്‍ താമസിച്ചിരുന്നത്.

ചാവേർ, തല്ലുമാല, ഉണ്ട, വൺ, സൗദി വെള്ളക്ക എന്നീ ചിത്രങ്ങളിലൂടെയാണ് നിഷാദ് ശ്രദ്ധേയനായത്. 2022 -ൽ തല്ലുമാല സിനിമയുടെ എഡിറ്റിങ്ങിന് മികച്ച ചിത്രസംയോജകനുളള സംസ്ഥാന അവാർഡും ലഭിച്ചിട്ടുണ്ട്.