ബോക്‌സോഫീസ് ഇളക്കിമറിച്ച് '2018'; കളക്ഷൻ 150 കോടി

ബോക്സോഫീസ് ഇളക്കി മറിച്ച് ജൂഡ് ആന്തണി ചിത്രം '2018 Everyone Is A Hero'.150 കോടി കളക്ഷൻ നേടുന്ന ആദ്യ മലയാള ചിത്രമെന്ന നേട്ടം കൈവരിച്ചിരിക്കുകയാണ് ചിത്രം.റിലീസ് ചെയ്ത് മൂന്ന് വാരം പിന്നിടുമ്പോഴാണ് ഈ ചരിത്ര നേട്ടം.

ചിത്രത്തിന്റെ അണിയറ പ്രവർത്തകർ തന്നെയാണ് സന്തോഷവാർത്ത് ആരാധകരുമായി പങ്കുവച്ചത്. സാറ്റലൈറ്റ് കളക്ഷനൊന്നും കൂട്ടാതെ തീയറ്ററിൽ നിന്നുമാത്രമാണ് 150 കോടിയിലേക്ക് 2018 എത്തിയത്.

റിലീസ് ചെയ്ത് മൂന്നാം ആഴ്ചയ്ക്കുള്ളിലാണ് ചിത്രം 150 കോടി ക്ലബ്ബിൽ ഇടം നേടിയത്. 2018-ന്റെ നിർമാതാവ് വേണു കുന്നപ്പിള്ളിയാണ് ചിത്രത്തിന്റെ നേട്ടത്തെക്കുറിച്ച് ഫെയ്സ്ബുക്കിൽ പങ്കുവെച്ചു. 150 കോടിക്കൊപ്പം നിൽക്കുമ്പോഴും താൻ തലകുനിച്ചു കൈകൂപ്പി പ്രേക്ഷകരെ വന്ദിക്കുന്നുവെന്ന് വേണു കുറിച്ചു. അതിരുകടന്ന ആഹ്ലാദമോ അഹങ്കാരമോ ഇല്ലെന്നും ഇതെല്ലാം ദൈവ നിശ്ചയമാണെന്നും നിർമാതാവ് പറഞ്ഞു.

ദൈവത്തിന്റെ അനുഗ്രഹം എന്ന അടിക്കുറിപ്പൊടെയാണ് സംവിധായകൻ ജൂഡ് ആന്തണി സന്തോഷവാർത്ത പങ്കുവച്ചത്. സിനിമയിലെ കേന്ദ്ര കഥപാത്രമായി അഭിനയിച്ച ടൊവിനോ തോമസ്, ആസിഫ് അലി തുടങ്ങിയവരും സിനിമയുടെ വിവരം പങ്കുവച്ചിട്ടുണ്ട്.

നേരത്തെ ലോകമൊട്ടാകെ ഏറ്റവുമധികം കളക്ഷൻ നേടുന്ന മലയാള ചിത്രമെന്ന നേട്ടം പുലിമുരുകനിൽ നിന്നും 2018 സ്വന്തമാക്കിയിരുന്നു. റിപ്പോർട്ടുകൾ പ്രകാരം 146 കോടി രൂപയാണ് പുലിമുരുകന്റെ കളക്ഷൻ. 2018 ഇൻഡസ്ട്രി ഹിറ്റിലേയ്ക്ക് നീങ്ങുന്ന കാഴ്ചയ്ക്കാണ് ബോക്സോഫീസ് സാക്ഷ്യം വഹിച്ചുകൊണ്ടിരിക്കുന്നത്.