RDX Movie | ആര്‍ഡിഎക്സിന് കൈയ്യടിച്ച് ലിജോ ജോസ് പെല്ലിശേരി; ആശാനേ ചെക്കന്മാർ നല്ല പൊട്ടിക്കൽ ആണെന്ന് ആരാധകര്‍

മലയാളികളുടെ ഓണഘോഷത്തിന് മാറ്റ് കൂട്ടാന്‍ തിയേറ്ററുകളില്‍ ഗംഭീര പ്രതികരണം നേടി മുന്നേറുകയാണ് ആര്‍ഡിഎക്സ്. ഷെയ്ന്‍ നീഗം, ആന്‍റണി വര്‍ഗീസ്, നീരജ് മാധവ് എന്നി യുവതാരങ്ങളുടെ പവര്‍ പാക്ട് പെര്‍ഫോമന്‍സിന് പ്രേക്ഷകര്‍ നിറഞ്ഞ കൈയ്യടി നല്‍കി കഴിഞ്ഞു.

നവാഗതനായ നഹാസ് ഹിദായത്ത് സംവിധാനം ചെയ്ത ഈ 'അടി'പൊളി സിനിമ മിന്നല്‍ മുരളി അടക്കമുള്ള ചിത്രങ്ങള്‍ ഒരുക്കിയ വീക്കെന്‍ഡ് ബ്ലോക് ബെസ്റ്റേഴ്സിന്‍റെ സോഫിയ പോളാണ് നിര്‍മ്മിച്ചിരിക്കുന്നത്.

പ്രേക്ഷകരില്‍ നിന്ന് മികച്ച പ്രതികരണം നേടിയ സിനിമയെ പിന്തുണച്ച് സംവിധായകന്‍ ലിജോ ജോസ് പെല്ലിശേരിയും രംഗത്തെത്തി. തന്‍റെ ഫേസ്ബുക്ക് പേജില്‍ ആര്‍ഡിഎക്സ് എന്ന് പോസ്റ്റ് ചെയ്താണ് അദ്ദേഹം സിനിമയ്ക്കുള്ള പിന്തുണ അറിയിച്ചത്.

പിന്നാലെ പെല്ലിശേരിയ്ക്ക് നന്ദി അറിയിച്ച് ശിഷ്യന്‍ ആന്‍റണി വര്‍ഗീസും കമന്‍റ് ചെയ്തു. 'ആശാനെ' എന്നാണ് സ്നേഹപൂര്‍വം പെപ്പെ ഗുരുവിനോടുള്ള നന്ദി അറിയിച്ചത്.

പെല്ലിശേരിയുടെ പോസ്റ്റ് താഴെ ആരാധകരുടെ കമന്‍റുകള്‍ വന്ന് നിറയുകയാണ്.ആശാനേ ചെക്കന്മാർ നല്ല പൊട്ടിക്കൽ ആണ് എന്നാണ് ഒരു ആരാധകന്‍റെ കമന്‍റ്. പെപെ യുടെ ഇടി.. എന്ന് പറഞ്ഞാല്‍, അത് കാണാൻ തന്നെ ഒരു രസമാണ് എന്നാണ് മറ്റൊരു കമന്‍റ്.

കൊച്ചിയുടെ പശ്ചാത്തലത്തില്‍ ഒരു പള്ളിപ്പെരുന്നാളിന് ഉണ്ടാവുന്ന പ്രശ്നങ്ങളും അതേ തുടര്‍ന്നുള്ള സംഭവവികാസങ്ങളുമാണ് ' ആര്‍ഡിഎക്സ്' ചിത്രത്തിന്റെ പ്രമേയം. റോബര്‍ട്ട്, ഡോണി, സേവ്യര്‍ എന്നീ പേരുകളുടെ ചുരുക്കരൂപമാണ് ആര്‍ഡിഎക്സ്.

റോബര്‍ട്ട് ആയി ഷെയ്ൻ നിഗം എത്തുമ്ബോള്‍ ഡോണിയായി ആന്റണി വര്‍ഗീസും സേവ്യര്‍ ആയി നീരജ് മാധവും എത്തുന്നു. കെ.ജി.എഫ്, ബീസ്റ്റ്, വിക്രം എന്നീ ചിത്രങ്ങള്‍ക്ക് സംഘട്ടനം ഒരുക്കിയ അൻപറിവ് ആണ് ആര്‍ഡിഎക്സിലെ തീ പാറുന്ന ആക്ഷൻ രംഗങ്ങള്‍ ഒരുക്കിയത്.