Leo LCU | ഉദയനിധി ലിയോയുടെ സസ്പെന്‍സ് പൊട്ടിച്ചോ ? ലോകേഷിന്‍റെ മറുപടി ഇങ്ങനെ

സിനിമാലോകം ഏറെ പ്രതീക്ഷയോടെ കാത്തിരിക്കുന്ന വിജയ് ചിത്രം ലിയോ തിയേറ്ററുകളിലെത്താന്‍ ഇനി മണിക്കൂറുകള്‍ മാത്രമാണ് ബാക്കി.

കേരളത്തിലടക്കം ഗ്രാന്‍ഡ് റിലീസും വമ്പന്‍ പ്രീ ബുക്കിങ് കളക്ഷനും നേടിയ ചിത്രം ലോകേഷ് കനകരാജാണ് സംവിധാനം ചെയ്യുന്നത്.

വിവാദങ്ങളും വെല്ലുവിളികളും മറികടന്നുള്ള ദളപതിയുടെ ലിയോയെ വരവേല്‍ക്കാന്‍ ലോകമെമ്പാടുമുള്ള വിജയ് ആരാധകര്‍ തയാറെടുത്തു കഴിഞ്ഞു.

കേരളത്തില്‍ പുലര്‍ച്ചെ 4 മണിക്കും തമിഴ്നാട്ടില്‍ രാവിലെ 9 മണിക്കുമാണ് ആദ്യ പ്രദര്‍ശനം നടക്കുക. ലോകേഷ് കനകരാജിന്‍റെ മുന്‍ ചിത്രങ്ങളായ കൈതി, വിക്രം എന്നിവ ഉള്‍പ്പെടുന്ന ലോകേഷ് സിനിമാറ്റിക് യൂണിവേഴ്സ്- എല്‍സിയുവില്‍ ഉള്‍പ്പെടുന്ന ചിത്രമാണോ ലിയോ എന്നതാണ് ആരാധകര്‍ ഏറെ കാലമായുള്ള സംശയം.

എന്തായാലും ലോകേഷിനോട് ആരാധകരും മാധ്യമങ്ങളും പലവട്ടം തിരിച്ചുംമറിച്ചും ചോദിച്ചിട്ടും 'പടം പാറുങ്കേ' എന്ന ഒറ്റവാക്കിലാണ് അദ്ദേഹം മറുപടി നല്‍കിയത്. എന്തായാലും ആ സസ്പെന്‍സിനെ ആദ്യ പ്രദര്‍ശനം കഴിയും വരെയാകും ആയുസ് ഉണ്ടാവുക.

കഴിഞ്ഞ ദിവസം ചിത്രത്തിന്‍റെ പ്രിവ്യു കണ്ട നടനും നിര്‍മ്മാതാവും മന്ത്രിയുമായ ഉദയ്നിധി സ്റ്റാലിന്‍ എക്സ് പ്ലാറ്റ്ഫോമില്‍ പങ്കുവെച്ച കുറിപ്പ് ഏറെ ചര്‍ച്ചയായിരുന്നു.

ലിയോ എല്‍സിയുവില്‍ ഉള്‍പ്പെടുന്ന ചിത്രമാകും എന്ന സൂചന നല്‍കുന്നതായിരുന്നു ഉദയ്നിധിയുടെ പോസ്റ്റ്. നടന്‍ സിനിമയുടെ സസ്പെന്‍സ് പുറത്തുവിട്ടെന്ന ചര്‍ച്ചകള്‍ക്കും ഇതോടെ തുടക്കമായി. 

 ‘‘ദളപതി അണ്ണാ ലിയോ, ലോകേഷ് അത്യുഗ്രൻ ഫിലിം മേക്കിങ്, അനിരുദ്ധിന്റെ സംഗീതം, അൻപറിവ് മാസ്റ്ററിന്റെ ആക്‌ഷൻ. എല്ലാ ആശംസകളും.’’–ഇങ്ങനെയായിരുന്നു ഉദയനിധിയുടെ ട്വീറ്റ്. ട്വീറ്റിന്റെ അവസാനം എൽസിയുവിന്റെ ഹാഷ് ടാഗ് കൂടി കണ്ടതോടെ ആരാധകർക്ക് ആവേശം ഇരട്ടിയായി.

ലോകേഷും ലിയോ ടീമും നിധി പോലെ കാത്തുവെച്ച രഹസ്യം ഉദയനിധി പൊട്ടിച്ചുവെന്നും ആ സർപ്രൈസ് ഫാക്ടർ അതുപോലെ തന്നെ കാത്തുസൂക്ഷിക്കേണ്ടതായിരുന്നു എന്നും പിന്നീട് സമൂഹമാധ്യമങ്ങളിൽ ചർച്ചയായി.

 കഴിഞ്ഞ ദിവസം നടന്ന പ്രത്യേക പ്രദർശനത്തിലാണ് ഉദയനിധി സിനിമ കണ്ടത്. നേരത്തെ ലോകേഷ് സംവിധാനം ചെയ്ത വിക്രം സിനിമയുടെ വിതരണാവകാശം ഉദയനിധിയുടെ റെഡ് ജയന്റ് സിനിമാസ് ആയിരുന്നു,

ഇപ്പോഴിതാ ഈ വിഷയത്തിൽ പ്രതികരണവുമായി എത്തുകയാണ് സംവിധായകൻ ലോകേഷ് കനകരാജ്. എൽസിയു എന്നെഴുതിയതിന് ശേഷം കണ്ണടച്ചുള്ള ഒരു ഇമോജിയും ട്വീറ്റിനൊപ്പം ഉദയനിധി ചേർത്തിരുന്നുവെന്നും അതുകൊണ്ടു തന്നെ അതിന്റെ ഉത്തരം നാളെ സിനിമ കാണുമ്പോൾ ലഭിക്കുമെന്നും ലോകേഷ് പറഞ്ഞു.

സഞ്ജയ് ദത്ത്, അര്‍ജുൻ സര്‍ജ, ഗൗതം മേനോൻ, മിഷ്കിൻ, മാത്യു തോമസ്, മൻസൂര്‍ അലി ഖാൻ, പ്രിയ ആനന്ദ്, സാൻഡി, ജനനി, അഭിരാമി വെങ്കിടാചലം, ബാബു ആന്റണി എന്നിങ്ങനെ വമ്പൻ താരനിരയാണ് ലിയോയിൽ അണിനിരക്കുന്നത്. സെൻസറിംഗ് പൂര്‍ത്തിയായ ചിത്രത്തിന് യു എ സര്‍ട്ടിഫിക്കറ്റ് ആണ്. അനിരുദ്ധ് രവിചന്ദര്‍ ആണ് സംഗീത സംവിധാനം നിർവഹിച്ചിരിക്കുന്നത്