Kannur Squad | 'ആക്ടർ ആയി എസ്റ്റാബ്ലിഷ് ചെയ്യാന്‍ പോകുന്ന സിനിമ'; കണ്ണൂര്‍ സ്ക്വാഡിലെ അസീസ് നെടുമങ്ങാടിന്‍റെ പ്രകടനത്തെ പ്രശംസിച്ച് മമ്മൂട്ടി

ടെലിവിഷന്‍ കോമഡി പരിപാടികളിലൂടെ ഹാസ്യതാരമായി മലയാളികള്‍ക്ക് പ്രിയങ്കരനായി മാറിയ നടനാണ് അസീസ് നെടുമങ്ങാട്. പിന്നീട് സിനിമകളില്‍ ചെറിയ വേഷങ്ങള്‍ ചെയ്ത് മുഖ്യധാരയിലേക്ക് കടന്നുവന്നു.

ആക്ഷന്‍മ ഹീറോ ബിജുവില്‍ പോലീസിനെ പേടിച്ച് വഴിയില്‍ കണ്ട വീട്ടില്‍ കയറി ' കുറച്ച് ചോറ് തരുമോ ചേച്ചി' എന്ന് ചോദിച്ച ആ കുടിയന്‍ കഥാപാത്രത്തെ ആരും മറന്നുകാണില്ല.

പിന്നീട് മമ്മൂട്ടി മുഖ്യമന്ത്രി കടയ്ക്കല്‍ ചന്ദ്രനായി എത്തിയ വണ്‍ എന്ന സിനിമയില്‍ ഒരു ഓട്ടോ ഡ്രൈവറുടെ വേഷത്തിലും അസീസ് തിളങ്ങി. മമ്മൂട്ടിയുമായുള്ള അസീസിന്‍റെ കോംബിേഷന്‍ സീന്‍ പ്രേക്ഷകര്‍ക്കിടയില്‍‌ ശ്രദ്ധിക്കപ്പെട്ടു.ജയജയജയജയഹേയിലെ ബേസിലിന്‍റെ ബന്ധുവിന്‍റെ റോളും പ്രേക്ഷകരില്‍ ചിരിപടര്‍ത്തി.

ഇപ്പോഴിതാ കണ്ണൂര്‍‌ സ്ക്വാഡ് എന്ന ഏറ്റവും പുതിയ സിനിമയില്‍ മമ്മൂട്ടിയൊടൊപ്പം ഒരു മുഴുനീള കഥാപാത്രത്തെയാണ് അസീസ് അവതരിപ്പിക്കുന്നത്. ഒരു ക്രൈം ഇന്‍വസ്റ്റിഗേഷന്‍ പോലീസ് സ്റ്റോറിയായി ഒരുങ്ങുന്ന കണ്ണൂര്‍ സ്ക്വാഡില്‍ സെപ്റ്റംബര്‍ 28ന് തിയേറ്ററുകളിലെത്തും.

സിനിമയുടെ പ്രൊമോഷന്‍ പരിപാടിയുടെ ഭാഗമായി നടന്ന ഒരു അഭിമുഖത്തില്‍ അസീസിന്‍റെ ചിത്രത്തിലെ പ്രകടനത്തെ കുറിച്ച് മമ്മൂട്ടി വലിയ പ്രശംസ നല്‍കുകയുണ്ടായി.

ഒരു ആക്ടർ ആയി അസീസ് എസ്റ്റാബ്ലിഷ് ചെയ്യാന്‍ പോകുന്ന സിനിമയാണ് കണ്ണൂർ സ്ക്വാഡെന്നായിരുന്നു മമ്മൂട്ടിയുടെ പ്രശംസ. പുറമെ കാണുന്ന ആളല്ല, അസീസിന്റെ കയ്യിൽ ചില കാര്യങ്ങളൊക്കെയുണ്ടെന്ന് നിങ്ങൾക്ക് മനസിലാകും.

പെർഫെക്ട് നടനായിട്ടാണ് അസീസ് ജോസ് എന്ന പോലീസ് കഥാപാത്രത്തെ കണ്ണൂർ സ്ക്വാഡിൽ അവതരിപ്പിച്ചിരിക്കുന്നത്. ഒരണ അപ്പുറത്തുമില്ല ഇപ്പുറത്തുമില്ല എന്ന രീതിയിലാണ് അസീസ് ആ കഥാപാത്രത്തെ അവതരിപ്പിച്ചതെന്ന് മമ്മൂട്ടി പറഞ്ഞു.

'നീ ഒരുപാട് കോമഡിയെല്ലാം ചെയ്തിട്ടുള്ള ഒരാളാണ്. പക്ഷേ ഈ കഥാപാത്രം ചെയ്യുമ്പോൾ നീ നിന്റെ പല്ല് പോലും പുറത്ത് കാണിക്കരുത്. നീ ചിരിക്കരുത്. നീ ഒരു പൊലീസുകാരനാണ്' എന്നാണ് മമ്മൂക്ക എന്നോട് പറഞ്ഞത്.

ഇങ്ങനെ ഒന്നും പറഞ്ഞതായി മമ്മൂക്കയ്ക്ക് ഓർമ്മയുണ്ടാവില്ലെന്നും എന്നാൽ ആ വാക്കുകൾ മനസിൽ വച്ചാണ് താൻ ഈ സിനിമ മുഴുവൻ അഭിനയിച്ചതെന്നുമായിരുന്നു അസീസ് പറഞ്ഞത്.