Premalu | മഞ്ഞുമ്മല്‍ ബോയ്സിനൊപ്പം തമിഴകത്ത് കത്തിക്കയറാന്‍ 'പ്രേമലു'വും; തമിഴ് വിതരണാവകാശം സ്വന്തമാക്കി ഉദയനിധി സ്റ്റാലിന്‍

മഞ്ഞുമ്മല്‍ ബോയ്സിലൂടെ മലയാള സിനിമ തമിഴകത്ത് നേടിയ ഉജ്വല വിജയം ആവര്‍ത്തിക്കാന്‍ ഇനി പ്രേമലുവും. ഗിരീഷ് എഡിയുടെ സംവിധാനത്തില്‍ നസ്ലെന്‍ , മമിത ബൈബു എന്നിവരെ കേന്ദ്ര കഥാപാത്രങ്ങളാക്കി ഒരുക്കിയ ചിത്രത്തിന്‍റെ തമിഴ് പതിപ്പ് ഉടന്‍ റിലീസ് ചെയ്യും.

ഭാവന സ്റ്റുഡിയോസിന്‍റെ ബാനറില്‍  ദിലീഷ് പോത്തൻ, ഫഹദ് ഫാസിൽ, ശ്യാം പുഷ്ക്കരൻ എന്നിവർ ചേര്‍ന്ന് നിര്‍മ്മിച്ച ചിത്രത്തിന്‍റെ തമിഴ് വേര്‍ഷന് ഉദയനിധി സ്റ്റാലിന്‌‍റെ റെഡ് ജയിന്‍റ് മൂവീസാണ് തിയേറ്ററുകളിലെത്തിക്കുന്നത്.

മാര്‍ച്ച് 15ന് തമിഴ്നാട്ടിലെ തിയേറ്ററുകളില്‍ റീലീസ് ചെയ്യുന്ന ചിത്രത്തിന്‍റെ ട്രെയിലര്‍ റെഡ് ജയിന്‍റ് സമൂഹമാധ്യമങ്ങളിലൂടെ പങ്കുവെച്ചു. മലയാളത്തില്‍ സൂപ്പര്‍ ഹിറ്റായതിന് പിന്നാലെ സിനിമയുടെ തെലുങ്ക് പതിപ്പ് ആന്ധ്രയിലും തെലങ്കാനയിലും റിലീസ് ചെയ്തിരുന്നു. 

മാര്‍ച്ച് എട്ടിന് റിലീസ് ചെയ്ത തെലുങ്ക് പ്രേമലു സംവിധായകൻ എസ്.എസ്. രാജമൗലിയുടെ മകൻ കാർത്തികേയയാണ്  വിതരണത്തിനെത്തിച്ചത്. വമ്പൻ തുകയ്ക്കാണ് സിനിമയുടെ മൊഴിമാറ്റ അവകാശം കാർത്തികേയ നേടിയതെന്നും റിപ്പോർട്ടുകളുണ്ട്. ബാഹുബലി റഫറന്‍സില്‍ പുറത്തുവന്ന പോസ്റ്ററും വൈറലായി.

തെലുങ്ക് റിലീസിന് പിന്നാലെ 100 കോടി കളക്ഷന്‍ എന്ന ഐതിഹാസിക നേട്ടവും പ്രേമലു സ്വന്തമാക്കിയിരുന്നു. കേരളത്തില്‍ നിന്ന് മാത്രം 50 കോടി കളക്ഷന്‍ സിനിമ സ്വന്തമാക്കി. തമിഴ് റിലീസിന് ശേഷം റെക്കോര്‍ഡ് കളക്ഷനിലേക്ക് ചിത്രം എത്തുമെന്നാണ് വിലയിരുത്തല്‍.

യുവത്വം ആഘോഷമാക്കിയ ചിത്രത്തില്‍ നസ്ലെനും മമിതയ്ക്കും ഒപ്പം സംഗീത് പ്രതാപ്, ശ്യാം മോഹൻ, അഖില ഭാർഗവൻ, അൽതാഫ് സലിം, മീനാക്ഷി രവീന്ദ്രന്‍ എന്നിവരും പ്രധാന വേഷത്തിലെത്തി.

ക്യാമറ: അജ്മൽ സാബു, എഡിറ്റിങ്: ആകാശ് ജോസഫ് വർഗീസ്, കലാ സംവിധാനം: വിനോദ് രവീന്ദ്രൻ, കോസ്റ്റ്യൂം ഡിസൈൻസ്: ധന്യ ബാലകൃഷ്ണൻ, മേക്കപ്പ്: റോണക്സ് സേവ്യർ, ആക്ഷൻ: ജോളി ബാസ്റ്റിൻ, കൊറിയോഗ്രഫി: ശ്രീജിത്ത് ഡാൻസിറ്റി, പ്രൊഡക്ഷൻ കൺട്രോളർ: സേവ്യർ റിച്ചാർഡ് , വി.എഫ്.എക്സ്.: എഗ് വൈറ്റ് വിഎഫ്എക്സ്, ഡി.ഐ.: കളർ പ്ലാനറ്റ് സ്റ്റുഡിയോസ്, എക്‌സിക്യുട്ടീവ് പ്രൊഡ്യൂസേഴ്സ്: ബെന്നി കട്ടപ്പന, ജോസ് വിജയ്, പി.ആര്‍.ഒ.: ആതിര ദില്‍ജിത്ത്.