SALAAR | സലാറിനെ കേരളത്തിലെത്തിക്കാന്‍ പൃഥ്വിരാജ് പ്രൊഡക്ഷന്‍സ് ! പ്രഭാസ് ചിത്രം ഡിസംബര്‍ 22ന് തന്നെ

കെജിഎഫ് തീര്‍ത്ത വന്‍ വിജയത്തിന് ശേഷം സംവിധായകന്‍ പ്രശാന്ത് നീല്‍ ഒരുക്കുന്ന പ്രഭാസ് ചിത്രം സലാറിന്‍റെ കേരളത്തിലെ വിതരണാവകാശം പൃഥ്വിരാജ് പ്രൊഡക്ഷന്‍സ് സ്വന്തമാക്കി.

ഹോംബാലെ ഫിലിംസ് നിര്‍മ്മിക്കുന്ന ചിത്രത്തില്‍ പ്രഭാസിനൊപ്പം വരദരാജ മന്നാര്‍ എന്ന വേഷത്തില്‍ അഭിനയിക്കുന്നതും പൃഥ്വിരാജ് ആണ്. 

 പൃഥ്വിരാജ് പ്രൊഡക്ഷൻസുമായി സഹകരിച്ച് സലാര്‍ കേരളത്തില്‍ അവതരിപ്പിക്കാന്‍  കഴിയുന്നതില്‍ സന്തോഷമുണ്ട്. അവിസ്മരണീയമായ ഒരു സിനിമാ അനുഭവത്തിനായി ഒരുങ്ങുക എന്നാണ് ഹൊംബാലെ ഫിലിംസിന്‍റെ പ്രതികരണം.

പ്രശാന്ത് നീല്‍- ഹോംബാലെ ടീമിന്‍റെ കെജിഎഫ് 2 കേരളത്തിലെത്തിച്ചതും പൃഥ്വിരാജ് പ്രൊഡക്ഷന്‍സ് ആയിരുന്നു. ചിത്രം മലയാളക്കരയിലും വന്‍ വിജയമാണ് നേടിയത്.

ഡിസംബര്‍ 22ന് റിലീസ് ചെയ്യുന്ന ചിത്രത്തിനായി വമ്പന്‍ പ്രോമൊഷന്‍ പരിപാടികളാണ് കേരളത്തിലുടനീളം പ്ലാന്‍ ചെയ്യുന്നത്. പുലര്‍ച്ചെയുള്ള ഷോകളും ആലോചനയിലുണ്ടെന്നാണ് വിവരം.

ദീപാവലിക്ക് പിന്നാലെ സലാര്‍ ടീം പ്രൊമോഷന്‍ പരിപാടികളിലേക്ക് കടക്കും. ചിത്രത്തിലെ നായകനായ പ്രഭാസും പൃഥ്വിക്കൊപ്പം കേരളത്തിലെ പരിപാടികളില്‍ പങ്കെടുത്തേക്കും.