രജനികാന്ത് ജയിലർ കാണുന്നത് യു.പി മുഖ്യമന്ത്രി യോഗി ആദിത്യനാഥിനൊപ്പം

ലക്‌നൗ: യു.പി മുഖ്യമന്ത്രി യോഗി ആദിത്യനാഥിനൊപ്പം 'ജയിലര്‍' കാണാൻ രജനികാന്ത് ലക്‌നൗവില്‍ എത്തി. രജനികാന്ത് തന്നെയാണ് ഇക്കാര്യം വ്യക്തമാക്കിയത്. യോഗി ആദിത്യനാഥിനൊപ്പം ജയിലർ കാണുന്ന വിവരം മാധ്യമപ്രവർത്തകരോടാണ് രജനികാന്ത് വ്യക്തമാക്കിയത്. കഴിഞ്ഞ ദിവസം വൈകിട്ടോടെ ലക്‌നൗ വിമാനത്താവളത്തിൽവെച്ചാണ് രജനികാന്ത് മാധ്യമപ്രവർത്തകരോട് സംസാരിച്ചത്.

ചിത്രത്തിനെക്കുറിച്ച് നല്ല അഭിപ്രായമാണുള്ളതെന്നും, എല്ലാം ഈശ്വരന്‍റെ അനുഗ്രഹമാണെന്നുമായിരുന്നു രജനികാന്ത് പറയുന്നത്. ചിത്രം പ്രദർശനത്തിനെത്തുന്നതിന് മുമ്പ് രജനികാന്ത് ഹിമാലയത്തിൽ പോയത് വലിയ വാർത്തയായിരുന്നു. റിലീസിന് തലേദിവസമാണ് രജനികാന്ത് ഹിമാലയത്തിലേക്ക് പോയത്.

ബോക്സോഫീസിൽ വൻ വിജയമാണ് ജയിലർ നേടിയത്. ആഗോളതലത്തിൽ 500 കോടി കളക്ഷൻ എന്ന നേട്ടത്തിലേക്ക് കടക്കുകയാണ് ചിത്രം. ആരാധകരെ പൂർണമായും തൃപ്തിപ്പെടുത്തുന്ന പ്രകടനമാണ് ചിത്രത്തിൽ രജനികാന്ത് കാഴ്ചവെച്ചിരിക്കുന്നത്.

അതിഥി ലേഷത്തിലെത്തുന്ന മലയാളി താരം മോഹൻലാലും ഗംഭീര പ്രകടനമാണ് നടത്തിയത്. പ്രേക്ഷകരുടെ നിറഞ്ഞ കൈയടിയാണ് മോഹൻലാലിന് ലഭിച്ചത്.

ചിത്രത്തിൽ വില്ലൻ വേഷത്തിലെത്തിയ മലയാള താരം വിനായകനും തകർപ്പൻ പ്രകടനമാണ് നടത്തിയത്. രജനികാന്തിനൊപ്പം നിൽക്കുന്ന വില്ലൻ കഥാപാത്രമാണ് വിനായകന്‍റേത് എന്നാണ് പ്രേക്ഷകർ അഭിപ്രായപ്പെടുന്നത്.

കന്നഡ സൂപ്പർതാരം ശിവരാജ് കുമാർ, ബോളിവുഡ് താരം ജാക്കി ഷിറോഫ്, രമ്യ കൃഷ്ണൻ, സുനില്‍, വസന്ത് രവി, റെഡിൻ കിംഗ്‌സ്‌ലേ എന്നിവരും പ്രധാന വേഷങ്ങളിൽ എത്തുന്നുണ്ട്. കാവാലയ്യ എന്ന ഗാനരംഗത്തിൽ പ്രത്യക്ഷപ്പെട്ട തമന്നയും തിയറ്ററുകളെ ഇളക്കിമറിച്ചു.