Rhea Chakraborty| ബോളിവുഡ് ലഹരിമരുന്ന് കേസ്: റിയ ചക്രബർത്തിയുടെ കസ്റ്റഡി കാലാവധി ഒക്ടോബർ 20 വരെ നീട്ടി

സുശാന്ത് സിങ്ങിന്റെ മരണവുമായി ബന്ധപ്പെട്ട് ഉയർന്ന ലഹരിമരുന്ന് കേസിൽ നടി റിയ ചക്രബർത്തിയുടെ കസ്റ്റഡി കാലാവധി വീണ്ടും നീട്ടി.

ഒക്ടോബർ 20 വരെയാണ് കാലാവധി നീട്ടിയത്. സെപ്റ്റംബർ 9 നാണ് റിയയെ നാർകോടിക്സ് ബ്യൂറോ അറസ്റ്റ് ചെയ്തത്.

റിയ ചക്രബർത്തിയെ കൂടാതെ സഹോദരൻ ഷോവിക് ചക്രബർത്തിയടക്കമുള്ളവരുടേയും കസ്റ്റഡി കാലാവധി നീട്ടിയിട്ടുണ്ട്. നേരത്തേ റിയയുടെ ജാമ്യാപേക്ഷ കോടതി തള്ളിയിരുന്നു.

റിയ, ഷോവിക് ചക്രബർത്തി, സുശാന്തിന്റെ ഹൗസ് മാനേജർ സാമുവൽ മിരാൻഡ അടക്കം ആറ് പേരെയാണ് എൻസിബി ആദ്യഘടത്തിൽ അറസ്റ്റ് ചെയ്തിരുന്നത്. മുംബൈയിലെ ബൈക്കുള ജയിലിലാണ് നടി ഇപ്പോഴുള്ളത്.

റിയയുടെ ജാമ്യാപേക്ഷയെ എൻസിബി ശക്തമായി എതിർത്തിരുന്നു. ലഹരിമരുന്ന് ഉപയോഗത്തിനെതിരെ സമൂഹത്തിന് ശക്തമായ സന്ദേശം നൽകണമെന്നായിരുന്നു എൻസിബി കോടതിയിൽ പറഞ്ഞത്. ലഹരിമരുന്ന് സംഘത്തിലെ സുപ്രധാന കണ്ണികളാണ് റിയയയും സഹോദരനുമെന്നാണ് എൻസിബിയുടെ വാദം.

ലഹരിമരുന്ന് കേസിൽ ബോളിവുഡ് താരങ്ങളായ ദീപിക പദുകോൺ, സാറ അലി ഖാൻ, ശ്രദ്ധ കപൂർ, രാകുൽ പ്രീത് സിങ് എന്നീ നടിമാരേയും എൻസിബി ചോദ്യം ചെയ്തിരുന്നു.

ജൂൺ 14 നാണ് സുശാന്ത് സിങ് രജ്പുത്തിനെ മുംബൈയിലെ വസതിയിൽ മരിച്ച നിലയിൽ കണ്ടെത്തിയത്. ഇതിന് പിന്നാലെയാണ് ലഹരിമരുന്ന് ആരോപണം ഉയർന്നത്.

സുശാന്തിന്റെ മരണത്തിൽ സിബിഐ അന്വേഷണം തുടരുകയാണ്. സുശാന്തിന്റേത് ആത്മഹത്യ തന്നെയാണെന്ന് കഴിഞ്ഞ ദിവസം എയിംസിലെ ഡോക്ടർമാർ സിബിഐക്ക് റിപ്പോർട്ട് നൽകിയിരുന്നു.