Salaar Box office | അമ്പരപ്പിക്കുന്ന കുതിപ്പ്; ആദ്യ മൂന്ന് ദിനത്തിൽ സലാർ കളക്ഷൻ കണക്കുകൾ പുറത്ത്

ബാഹുബലി നായകൻ പ്രഭാസിന്‍റെ പുതിയ ചിത്രം ബോക്സോഫീസിൽ വൻ തരംഗമായി മാറുന്നതായി റിപ്പോർട്ട്. ചിത്രം റിലീസ് ചെയ്ത് മൂന്ന് ദിനം പിന്നിട്ടപ്പോഴുള്ള സലാറിന്‍റെ കളക്ഷൻ കണക്കുകൾ പുറത്തുവന്നു. മൂന്ന് ദിവസത്തിനുള്ളിൽ സലാർ 402 കോടിയിലേറെ രൂപയാണ് കളക്ഷനായി നേടിയിരിക്കുന്നത്.

ഇതോടെ 2023ൽ ഇന്ത്യയിൽ ഏറ്റവുമധികം കളക്ഷൻ നേടിയ ചിത്രങ്ങളുടെ പട്ടികയിലുള്ള ജവാനെയും ലിയോയെയും സലാർ നിഷ്പ്രയാസം മറികടന്നേക്കുമെന്നാണ് റിപ്പോർട്ട്. രാജമൗലി ഒരുക്കിയ ബാഹുബലി ഇന്ത്യൻ ബോക്സോഫീസിൽ തീർത്ത മാസ്മരികതയുടെ പിന്നാലെയാണ് സലാറും.

ബാഹുബലി ഇറങ്ങുന്നതുവരെ ഇന്ത്യൻ സിനിമയിൽ 100 കോടി കളക്ഷൻ എന്നത് സ്വപ്നസമാനമായ നേട്ടമായിരുന്നു. എന്നാൽ ഇന്ന് അത് സാധാരണമായിരിക്കുന്നു. ജവാൻ, പത്താൻ എന്നീ ഷാരൂഖ് ചിത്രങ്ങൾ 1000 കോടി ക്ലബിലെത്തിയിരുന്നു. തെന്നിന്ത്യയിൽ വിജയ് നായകനായ ലിയോ എന്ന ചിത്രവും കളക്ഷനിൽ റെക്കോർഡുകൾ സ്വന്തമാക്കിയിരുന്നു.

ഇപ്പോഴിതാ, കളക്ഷൻ റെക്കോർഡിൽ ജവാനെയും ലിയോയെയും സലാർ മറികടക്കുമോയെന്നാണ് ഏവരും ഉറ്റുനോക്കുന്നത്. ആദ്യ മൂന്ന് ദിനത്തിൽ തന്നെ 402 കോടി രൂപയാണ് സലാർ നേടിയിരിക്കുന്നത്.

കെജിഎഫ് ചിത്രങ്ങളുടെ സംവിധായകൻ പ്രശാന്ത് നീൽ ആണ് സലാർ ഒരുക്കിയിരിക്കുന്നത്. പ്രഭാസ് അവതരിപ്പിക്കുന്ന കേന്ദ്രകഥാപാത്രമാണ് സലാറിന്‍റെ പ്രത്യേകത. മലയാളി താരം പൃഥ്വിരാജ് അവതരിപ്പിച്ച കഥാപാത്രവും സലാറിൽ കൈയടി നേടുന്നുണ്ട്.

ചിത്രത്തിൽ പൃഥ്വിരാജ് അവതരിപ്പിക്കുന്ന കഥാപാത്രത്തിന്‍റെ പേര് വര്‍ദ്ധരാജ് മാന്നാർ എന്നാണ്. നായകന്റെ ഉറ്റ സുഹൃത്താണ് ചിത്രത്തിൽ വര്‍ദ്ധരാജ മാന്നാര്‍ എന്ന കഥാപാത്രം. ഏതായാലും കളക്ഷൻ റെക്കോർഡിൽ സലാർ എത്രത്തോളം മുന്നേറുമെന്നാണ് ഏവരും ഉറ്റുനോക്കുന്നത്. വരുംദിവസങ്ങളിലും ബോക്സോഫീസിലെ ഗംഭീര പ്രകടനം നിലനിർത്താനായാൽ സലാർ റെക്കോർഡുകൾ തിരുത്തിക്കുറിക്കും.