Adipurush| രാമനാകാൻ പ്രഭാസിന് പ്രതിഫലം 100 കോടിക്കു മുകളിൽ; ജാനകിയായ കൃതി സനോന് 3 കോടി രൂപ

കാത്തിരിപ്പുകൾക്കൊടുവിൽ പ്രഭാസ് ചിത്രം ആദിപുരുഷ് തിയേറ്ററുകളിൽ എത്തിയിരിക്കുകയാണ്. ഇന്ത്യൻ സിനിമയിൽ ഏറ്റവും കൂടുതൽ മുതൽ മുടക്കിൽ ഒരുക്കിയ ചിത്രമെന്ന ഖ്യാതിയോടെയാണ് ആദിപുരുഷ് തിയേറ്ററുകളിലെത്തിയത്.

ബാഹുബലിക്കു ശേഷം ആരാധകരെ തൃപ്തിപ്പെടുത്തുന്ന ഒരു ചിത്രം പോലും പ്രഭാസിന് നൽകാൻ കഴിഞ്ഞിരുന്നില്ല. അതിനാൽ തന്നെ വലിയ ആവേശത്തിലാണ് ആദിപുരുഷിനെ ആരാധകർ സ്വീകരിച്ചത്. താരത്തിന്റെ തിരിച്ചുവരവായിട്ടാണ് ചിത്രത്തെ ആരാധകർ കാണുന്നത്.

രാമയണ കഥയെ ആസ്പദമാക്കി ഒരുക്കിയ ആദിപുരുഷിൽ രാമനായാണ് പ്രഭാസ് എത്തുന്നത്. ചിത്രത്തിനായി വൻ തുകയാണ് താരത്തിന്റെ പ്രതിഫലം. റിപ്പോർട്ടുകൾ ശരിയാണെങ്കിൽ 100-150 കോടി രൂപയാണ് പ്രഭാസ് വാങ്ങിയത്. ചിത്രത്തിന്റെ ആകെ ബജറ്റ് 500 കോടിയോളമാണ്.

രാവണന്റെ വേഷം ചെയ്തിരിക്കുന്നത് ബോളിവുഡ് താരം സെയ്ഫ് അലി ഖാനാണ്. 12 കോടി രൂപയാണ് സെയ്ഫ് ചിത്രത്തിനായി വാങ്ങിയ പ്രതിഫലം. ഇതോടെ ബോളിവുഡിൽ നെഗറ്റീവ് വേഷം ചെയ്യാൻ ഏറ്റവും പ്രതിഫലം വാങ്ങുന്ന താരങ്ങളുടെ പട്ടികയിൽ സെയ്ഫും ഇടം നേടി.

ആദിപുരുഷിൽ മറ്റൊരു പ്രധാന കഥാപാത്രത്തെ അവതരിപ്പിച്ചത് ബോളിവുഡ് നടി കൃതി സനോനാണ്. സീതാ ദേവിയുടെ കഥാപാത്രമായ ജാനകിയായാണ് കൃതി വേഷമിട്ടത്. രാമനായി എത്തിയ പ്രഭാസിനേക്കാളും രാവണനായ സെയ്ഫിനേക്കാളും വളരെ കുറഞ്ഞ പ്രതിഫലമാണ് കൃതിക്ക് ലഭിച്ചതെന്നാണ് റിപ്പോർട്ടുകൾ.

മൂന്ന് കോടിയാണ് കൃതി സനോന് ലഭിച്ച പ്രതിഫലമെന്നാണ് സിയാസത്ത് ഡോട്ട് കോം റിപ്പോർട്ടിൽ പറയുന്നത്. ലക്ഷ്മണന്റെ വേഷം ചെയ്ത സണ്ണി സിംഗിന് ലഭിച്ച പ്രതിഫലം 1.5 കോടിയാണ്.