Santhosh Keezhattoor | നടന്‍ സന്തോഷ് കീഴാറ്റൂരിന്‍റെ ഏകാംഗ നാടകം 'പെണ്‍നടന്‍' വീണ്ടും അരങ്ങില്‍

പ്രമുഖ മലയാള നടന്‍ സന്തോഷ് കീഴാറ്റൂര്‍ അവതരിപ്പിക്കുന്ന ഏകാംഗ നാടകം പെണ്‍നടന്‍ വീണ്ടും അരങ്ങിലെത്തി. കോവളം കേരള ആര്‍ട്ട്‌സ് ആന്‍ഡ് ക്രാഫ്റ്റ്‌സ് വില്ലേജില്‍ സെന്റര്‍ സ്‌റ്റേജ് ദ്വൈവാര കലാസന്ധ്യകളുടെ ഭാഗമായാണ് നാടകം അവതരിപ്പിച്ചത്.

പ്രശസ്ത സുപ്രസിദ്ധ നാടകനടൻ ഓച്ചിറ വേലുക്കുട്ടി ആശാന്റെ നാടകജീവിതമാണ് പെൺനടനിലെ പ്രമേയം . നാടകാദി കലകളിൽ നിന്നും സ്ത്രീകൾ മാറ്റിനിർത്തപ്പെട്ട സാമൂഹിക അനീതികൾ നിറഞ്ഞ ഒരു കാലഘട്ടത്തെയാണ് പെൺനടൻ  ഓര്‍മപ്പെടുത്തുന്നത്.

നായകവേഷങ്ങൾ ചെയ്യാൻ ആഗ്രഹിച്ച ഒരു നടൻ സ്ത്രീവേഷങ്ങളിൽ മാത്രം അരങ്ങിലേക്കെത്താൻ നിർബന്ധിതനാകുന്നതിന്റെ അന്തഃസംഘർഷങ്ങളും അഭിനയമുഹൂർത്തങ്ങളുമാണ് പെൺനടൻ അവതരിപ്പിക്കുന്നത്.

കേരളത്തിനകത്തും പുറത്തുമായി നിരവധി വേദികള്‍ അവതരിപ്പിച്ചിട്ടുള്ള പെണ്‍ നടന്‍ എന്ന നാടകം ഒരു ഇടവേളയ്ക്ക് ശേഷമാണ് വീണ്ടും വേദികളിലെത്തുന്നത്.

കണ്ണൂർ സംഘചേതനയുടെ നാടകത്തിൽ 16-ാം വയസ്സിൽ അഭിനയിച്ചുകൊണ്ടാണ് സന്തോഷ് കീഴാറ്റുര്‍ പ്രൊഫഷണൽ നാടക രംഗത്ത് എത്തുന്നത്. തിരുവനന്തപുരം അക്ഷരകല, കെപിഎസി തുടങ്ങിയ സംഘങ്ങളിൽ അഭിനയിച്ചു. കോഴിക്കോട്‌ ഗോപിനാഥ്‌, കുഞ്ഞിമംഗലം രാഘവൻ മാസ്‌റ്റർ എന്നിവരാണ്‌ നാടകത്തിൽ സന്തോഷിന്റെ ഗുരുക്കന്മാർ. സ്കൂൾ, കോളജ് കുട്ടികൾക്കായി നാടകം എഴുതിക്കൊടുത്തു. സന്തോഷ് നിരവധി നാടകങ്ങൾ കുട്ടികൾക്ക് വേണ്ടി സംവിധാനം ചെയ്യുകയും അവയിൽ അഭിനയിക്കുകയും ചെയ്തിട്ടുണ്ട്.

2006ലെ മികച്ച നാടക നടനുള്ള സംസ്ഥാന പുരസ്കാരം നേടിയ അദ്ദേഹം നിരവധി സിനിമകളിലും സീരിയലുകളിലും അഭിനയിച്ചിട്ടുണ്ട്.