ഇത് ഇവിടം കൊണ്ട് അവസാനിക്കുന്നില്ല; ജവാന് രണ്ടാം ഭാഗമോ? സൂചനയുമായി ഷാരൂഖ് ഖാൻ

സെപ്റ്റംബർ ഏഴിന് പുറത്തിറങ്ങിയ ഷാരൂഖ് ഖാൻ ചിത്രം ജവാൻ ഗംഭീരമായി തീയറ്ററുകളില്‍ ഓടുകയാണ്. ചിത്രത്തിന്റെ റിലീസ് ചെയ്ത് മൂന്ന് ദിവസത്തിനുള്ളിൽ മുതൽ മുടക്ക് തിരിച്ചുപിടിച്ചിരിക്കുകയാണ്.

ആകെ ബജറ്റിനെക്കാളും കളക്ഷൻ നേടി മുന്നേറുകയാണ് ആറ്റ്ലീ സംവിധാനം ചെയ്ത ജവാൻ. ലോകമെമ്പാടുമായി ജവാൻ ഇതിനകം 350 കോടി നേടിയതായാണ് ട്രേഡ് എക്സ്പേർട്ട് മനോബലയുടെ ട്വീറ്റ്.

ഇപ്പോഴിതാ ചിത്രം ആരാധകര്‍ സ്വീകരിച്ചതോടെ ജവാന്റെ രണ്ടാംഭാഗം ഉണ്ടാകുമോ എന്ന പ്രതീക്ഷയിലാണ് പ്രേക്ഷകർ. അതിനിടെയില്‍ ആരാധകന്റെ ചോദ്യത്തിനുള്ള ഷാരൂഖ് ഖാന്റെ മറുപടിയാണ് വൈറലായിരിക്കുന്നത്.

ഷാരൂഖിന്റെ ട്വീറ്റ് പ്രേക്ഷകരുടെ ഇടയിൽ വലിയ ചർച്ചയായിട്ടുണ്ട്. ജവാന് രണ്ടാംഭാഗം ഉണ്ടാകുമെന്ന സൂചനയാണ് നടൻ നൽകിയിരിക്കുന്നതെന്നാണ് ആരാധകരുടെ കണ്ടെത്തൽ.

ഇത് കൂടാതെ താൻ വിജയ് സേതുപതി സാറിന്റെ വലിയ ആരാധകനാണെന്നും ഷാരൂഖ് കുറിച്ചു.

ആറ്റ്ലീയുടെ ആദ്യ ബോളിവുഡ് ചിത്രമാണ് ജവാൻ. നയൻതാര ബോളിവുഡിൽ നായികയാകുന്ന ആദ്യ ചിത്രത്തിൽ വിജയ് സേതുപതിയാണ് വില്ലൻ വേഷം അവതരിപ്പിച്ചത്. ദീപിക പദുകോണും ചിത്രത്തിൽ പ്രധാന വേഷത്തിലെത്തുന്നുണ്ട്.