ബഹ്റൈന്‍ KSCA പുരസ്കാരങ്ങൾ സമ്മാനിച്ചു

ബഹ്റൈനിലെ കേരളാ സോഷ്യൽ ആൻഡ് കൾച്ചറൽ അസോസിയേഷൻ (കെഎസ്‌സിഎ) മന്നം അനുസ്മരണ പരിപാടികളും പുരസ്കാര ദാനവും സംഘടിപ്പിച്ചു. ഏപ്രിൽ 21ന് ഇസാ ടൗണിലെ ഇന്ത്യൻ സ്കൂളിൽ നടന്ന വിപുലമായ ചടങ്ങിൽ മന്നം പുരസ്കാരം ഉണ്ണി മുകുന്ദനും വൈഖരി പുരസ്കാരം ശ്രീജിത് പണിക്കർക്കും സമ്മാനിച്ചു.

സാമൂഹ്യ പ്രവർത്തനങ്ങൾക്കുള്ള പുരസ്കാരം ബഹ്റൈൻ ക്യാപിറ്റൽ ഗവർണറേറ്റ് ഇൻഫർമേഷൻ ഡയറക്ടർ യൂസഫ് ലോറി, ജീവകാരുണ്യ പ്രവർത്തനങ്ങൾക്കുള്ള പുരസ്കാരം ബികെജി ഹോൾഡിങ് കമ്പനി ചെയർമാൻ കെ ജി ബാബു രാജൻ, ബിസിനസ് എക്സലൻസ് പുരസ്കാരം ഇലക്ട്രോ കൈനറ്റിക്സ് സിഇഒ ശരത് പിള്ള എന്നിവരും ഏറ്റുവാങ്ങി.

പുരസ്കാര ജേതാക്കളെ അഭിനന്ദിച്ച് നൽകിയ വിഡിയോ സന്ദേശത്തിൽ കേന്ദ്ര ഐടി മന്ത്രി രാജീവ് ചന്ദ്രശേഖർ ഇന്ത്യയും ബഹ്റൈനുമായുള്ള സൗഹൃദത്തെ കുറിച്ചും അതിൽ പ്രവാസികളുടെ പങ്കിനെ കുറിച്ചും സംസാരിച്ചു.

ഇന്ത്യൻ എംബസിയുടെയും ബഹ്റൈൻ ഗവണ്മെന്റിന്റെയും പ്രതിനിധികൾ ചടങ്ങിൽ സന്നിഹിതരായിരുന്നു.

കെഎസ്‌സിഎ പ്രസിഡണ്ട് പ്രവീൺ നായർ, ജനറൽ സെക്രട്ടറി സതീഷ് നായർ, ജനറൽ കൺവീനർ ഉല്ലാസ് കാരണവർ എന്നിവർ സംസാരിച്ചു. തുടർന്ന് കേരളത്തിന്റെയും ബഹ്റൈന്റെയും തനത് നൃത്ത-വാദ്യ കലാരൂപങ്ങൾ അവതരിപ്പിക്കപ്പെട്ടു.