ഡിജിറ്റൽ നമ്പർ പ്ലേറ്റുകൾ പരീക്ഷിക്കാനൊരുങ്ങി ദുബായ്; ധാരണാപത്രം ഒപ്പിട്ടു

ദുബായിൽ വാഹനങ്ങളിൽ പരീക്ഷണാടിസ്ഥാനത്തിൽ പുതിയ ഡിജിറ്റൽ നമ്പർ പ്ലേറ്റുകൾ സ്ഥാപിക്കുന്നു. ഇതു സംബന്ധിച്ച ധാരണാപത്രത്തിൽ റിവൈവർ ഓട്ടോ ആക്‌സസറീസ് ട്രേഡിങ് കമ്പനിയുമായി ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി ധാരണാപത്രം ഒപ്പിട്ടു.

പാർക്കിങ് സിസ്റ്റം, ടോൾ ഗേറ്റുകൾ, കാർ രേഖകളുടെ കാലാവധി എന്നിവയുമായും ഗതാഗതതടസ്സം നിരീക്ഷിക്കൽ, ലൈസൻസിങ്, റോഡ് സുരക്ഷ എന്നിവയുമായി ബന്ധപ്പെട്ട കാര്യങ്ങളും ഡിജിറ്റൽ നമ്പർ പ്ലേറ്റുകളുമായി ബന്ധിപ്പിച്ചിരിക്കും. വാഹനാപകടമോ മറ്റേതെങ്കിലും അടിയന്തര സാഹചര്യമോ ഉണ്ടായാൽ പൊലീസിനും ആംബുലൻസിനും ഡിജിറ്റൽ പ്ലേറ്റുകൾ വേഗത്തിൽ മുന്നറിയിപ്പ് സന്ദേശം നൽകും.

ട്രാഫിക്കിനെക്കുറിച്ചും റോഡിലുണ്ടായ അപകടത്തെക്കുറിച്ചും കാലാവസ്ഥയെക്കുറിച്ചുമുള്ള വിവരങ്ങളും ഡ്രൈവർമാർക്ക് പരസ്പരം പങ്കുവെക്കാം. ആർ.ടി.എ ലൈസൻസിങ് ഏജൻസി സി.ഇ.ഒ. അബ്ദുല്ല യൂസഫ് അൽ അലി, റിവൈവർ ജനറൽ മാനേജരും സീനിയർ വൈസ് പ്രസിഡന്റുമായ പാട്രിക് അലൻഗില്ലൂമാണ് ധാരണാപത്രത്തിൽ ഒപ്പിട്ടത്.

ദുബായിലെ ഗതാഗത നിയന്ത്രണം, സുരക്ഷ എന്നിവയിൽ വിപ്ലവം സൃഷ്ടിക്കുന്നതിനാണ് ഈ പുതിയ സാങ്കേതികവിദ്യ സജ്ജീകരിച്ചിരിക്കുന്നത്. ആധുനിക സാങ്കേതികവിദ്യകളെയും മറ്റ് ഗതാഗതസംവിധാനങ്ങളെയും ബന്ധിപ്പിക്കുന്നതിൽ ഡിജിറ്റൽ നമ്പർ പ്ലേറ്റിന് സവിശേഷപ്രാധാന്യമുണ്ടെന്ന് അൽ അലി പറഞ്ഞു.