ലോകകപ്പിൽ ഗാംഗുലിയുടെ നേട്ടത്തിനൊപ്പമെത്തി രോഹിത് ശർമ്മ

ലണ്ടൻ: മുൻ ഇന്ത്യൻ നായകൻ സൌരവ് ഗാംഗുലിയുടെ നേട്ടത്തിനൊപ്പമെത്തി രോഹിത് ശർമ്മ. ലോകകപ്പിൽ മൂന്ന് സെഞ്ച്വറിയെന്ന നേട്ടമാണ് കഴിഞ്ഞദിവസം ഇംഗ്ലണ്ടിനെതിരെ രോഹിത് ശർമ്മ കൈവരിച്ചത്. ഈ ലോകകപ്പിൽ രോഹിത് ശർമ്മയുടെ മൂന്നാം സെഞ്ച്വറിയായിരുന്നു ഇത്.

2003 ലോകകപ്പിലാണ് ഗാംഗുലി ഇന്ത്യയ്ക്കായി മൂന്ന് സെഞ്ച്വറികൾ നേടിയത്. നമീബിയയ്ക്കെതിരെ ഒന്നും കെനിയയ്ക്കെതിരെ രണ്ടു സെഞ്ച്വറികളുമാണ് ആഫ്രിക്കൻ ലോകകപ്പിൽ നായകനായിരുന്ന ഗാംഗുലി കുറിച്ചത്. സെമിയിൽ കെനിയയ്ക്കെതിരെ ഗാംഗുലി നേടിയ സെഞ്ച്വറിയാണ് ഇന്ത്യയെ അന്ന് ഫൈനലിലെത്തിച്ചത്.

ഈ ലോകകപ്പിൽ ദക്ഷിണാഫ്രിക്കയ്ക്കെതിരെയും(പുറത്താകാതെ 122) പാകിസ്ഥാനെതിരെയും(140) രോഹിത് ശർമ്മ സെഞ്ച്വറി നേടിയിരുന്നു. ഇതുകൂടാതെ ഓസീസിനെതിരെ(57) അർദ്ധസെഞ്ച്വറിയും അദ്ദേഹം നേടി.