കനത്ത മഴ: മഹാരാഷ്ട്രയിൽ അണക്കെട്ട് തകർന്ന് 2 മരണം; 22 പേരെ കാണാനില്ല

കനത്ത മഴയിൽ അണക്കെട്ട് തകർന്ന് രണ്ട് മരണം. മഹാരാഷ്ട്രയിലെ രത്നഗിരിയിലെ തിവാരി അണക്കെട്ടാണ് തകർന്നത്. 22 പേരെ കാണാതായിട്ടുണ്ട്.

അണക്കെട്ട് തകർന്നുണ്ടായ വെള്ളപ്പാച്ചിലിൽ ഡാമിന് സമീപത്തെ പന്ത്രണ്ടോളം വീടുകൾ ഒലിച്ചു പോയി.

സമീപത്തെ ഏഴോളം ഗ്രാമങ്ങളും വെള്ളപ്പൊക്ക ഭീഷണിയിലാണ്. സ്ഥലത്ത് രക്ഷാപ്രവർത്തനം പുരോഗമിക്കുകയാണ്.

കഴിഞ്ഞ കുറച്ച് ദിവസങ്ങളിലായി മഹരാഷ്ട്രയിൽ കനത്ത പേമാരിയാണ്. മുംബൈ അടക്കം സംസ്ഥാനത്തിന്റെ വിവിധ ഭാഗങ്ങൾ വെള്ളത്തിന് നടുവിലാണ്.

പ്രളയഭീതിയിൽ നാടും നഗരവും കഴിയുമ്പോഴാണ് ഭീതി ഉയർത്തി അണക്കെട്ട് തകർന്ന വാർത്ത എത്തുന്നത്.

നേരത്തെ പുനെയിൽ ജനവാസ മേഖലയിൽ മതില്‍ തകർന്ന് കുട്ടികളടക്കം ഇരുപത്തിയൊന്ന് പേർ മരിച്ചിരുന്നു. ഈ പേമാരികാലത്ത് റിപ്പോർട്ട് ചെയ്യപ്പെട്ട ഏറ്റവും വലിയ ദുരന്തമായിരുന്നു ഇത്.

മഴ രണ്ട് ദിവസം കൂടി തുടരുമെന്നാണ് കാലാവസ്ഥാ നിരീക്ഷണ കേന്ദ്രം അറിയിച്ചിരിക്കുന്നത്.