PM Modi Donations | പിഎം കെയേഴ്സ് ഫണ്ടിലേക്ക് ലക്ഷങ്ങൾ; വരുമാനത്തിൽ നിന്ന് സംഭാവനയായി ഇതുവരെ നൽകിയത് 100 കോടിക്കു മുകളിൽ

ന്യൂഡൽഹി: പ്രധാനമന്ത്രി നരേന്ദ്ര മോദി പിഎം കെയേഴ്സ് ഫണ്ടിലേക്ക് സംഭാവനയായി നൽകിയത് രണ്ടേകാൽ (2.25) ലക്ഷം രൂപ. ഫണ്ടിന്റെ പ്രാഥമിക ശേഖരണത്തിലേക്കാണ് പ്രധാനമന്ത്രി 2.25 ലക്ഷം രൂപ സംഭാവനയായി നൽകിയത്.

ഇത് മാത്രമല്ല പ്രധാനമന്ത്രി സംഭാവനയായി നൽകിയിരിക്കുന്നത്. പെൺകുട്ടികളുടെ വിദ്യാഭ്യാസം മുതൽ ഗംഗ ശുചീകരണത്തിനും നിരാലംബരുടെ ക്ഷേമത്തിനും പ്രധാനമന്ത്രി മോദി സംഭാവന നൽകിയിട്ടുണ്ട്. പ്രധാനമന്ത്രി മോദിയുടെ സംഭാവനകൾ ഇതുവരെ 103 കോടി രൂപ കവിഞ്ഞു.

2019ൽ കുംഭമേളയിലെ ശുചിത്വ തൊഴിലാളികളുടെ ക്ഷേമത്തിനായി ഫണ്ടിലേക്ക് തന്റെ സ്വന്തം സമ്പാദ്യത്തിൽ നിന്ന് 21 ലക്ഷം രൂപയാണ് പ്രധാനമന്ത്രി നരേന്ദ്ര മോദി സംഭാവനയായി നൽകിയത്.

ദക്ഷിണ കൊറിയയിലെ സിയോളിൽ നിന്ന് ലഭിച്ച സമാധാന പുരസ്കാരത്തിലെ 1.3 കോടി രൂപയും സമ്മാനം ലഭിച്ചയുടൻ തന്നെ പുണ്യനദിയായ ഗംഗ ശുചീകരിക്കാനുള്ള പദ്ധതിയായ നമാമി ഗംഗയ്ക്കായി കൈമാറി.

അടുത്തിടെ, പ്രധാനമന്ത്രി നരേന്ദ്ര മോദിക്ക് ലഭിച്ച മെമന്റോകളുടെ ലേലത്തിൽ നിന്ന് മാത്രം 3.40 കോടി രൂപ ശേഖരിച്ചിരുന്നു. ഇതിൽ നിന്ന് ലഭിച്ച തുകയും നമാമി ഗംഗ പദ്ധതിക്കായി നൽകുകയാണ് ചെയ്തത്.

നേരത്തെ, പ്രധാനമന്ത്രി മോദി 2015 വരെ തനിക്ക് ലഭിച്ച പുരസ്കാരങ്ങൾ ലേലം ചെയ്യാൻ മുൻകൈ എടുത്തിരുന്നു. സൂറത്തിൽ നടന്ന ലേലത്തിൽ 8.35 കോടി രൂപ ലഭിക്കുകയും ആ തുക പൂർണമായും നമാമി ഗംഗ മിഷനായി നൽകുകയും ചെയ്തു.

ഗുജറാത്ത് മുഖ്യമന്ത്രി പദത്തിൽ കാലാവധി പൂർത്തിയാക്കിയ സമയത്ത് അദ്ദേഹം തന്റെ സ്വന്തം സമ്പാദ്യത്തിൽ നിന്ന് 21 ലക്ഷം രൂപ ഗുജറാത്ത് സർക്കാരിലെ സ്റ്റാഫുകളുടെ വിദ്യാഭ്യാസത്തിനായി നൽകി.

മുഖ്യമന്ത്രിയായിരുന്ന കാലത്ത് തനിക്ക് ലഭിച്ച എല്ലാ സമ്മാനങ്ങളും ലേലം ചെയ്ത് കിട്ടിയ തുകയായ 89.96 കോടി രൂപ മോദി കന്യ കെളവാണി ഫണ്ടിലേക്ക് സംഭാവന ചെയ്തു. ഈ സ്കീമിലൂടെ പെൺകുട്ടികളുടെ വിദ്യാഭ്യാസത്തിനു വേണ്ടിയാണ് ഈ തുക ഉപയോഗിക്കുന്നത്.