Asian games | 107 മെഡലുകൊണ്ട് റെക്കോർഡ് നേട്ടവുമായി വന്ന കായിക താരങ്ങൾക്ക് പ്രധാനമന്ത്രിയുടെ ആദരം

ഏഷ്യൻ ഗെയിംസിൽ 107 മെഡലുകൊണ്ട് റെക്കോർഡ് നേട്ടവുമായി വന്ന കായിക താരങ്ങൾക്ക് ആദരമർപ്പിച്ച് പ്രധാനമന്ത്രി നരേന്ദ്രമോദി. 

ഇന്ത്യൻ സംഘത്തെയും അവരുടെ നേട്ടങ്ങളെയും അദ്ദേഹം അഭിനന്ദിച്ചു. ഡൽഹിയിലായിരുന്നു കായികതാരങ്ങളുമായുള്ള പ്രധാനമന്ത്രിയുടെ കൂടിക്കാഴ്ച. 

രാജ്യത്തെ ജനങ്ങൾക്ക് വേണ്ടി ഞാൻ നിങ്ങളെ സ്വാഗതം ചെയ്യുന്നു. നിങ്ങളുടെ കഠിനാധ്വാനത്തിന്റെ ഫലമായുണ്ടായ ഈ നേട്ടത്തിൽ രാജ്യം അഭിമാനിക്കുന്നു. പാരീസ് ഒളിമ്പിക്‌സിൽ മികച്ച നേട്ടം കൈവരിക്കാനായി ശ്രമിക്കാനും കായിക താരങ്ങളോട് മോദി പറഞ്ഞു.

'ഏഷ്യൻ ഗെയിംസിൽ ഇന്ത്യയെ പ്രതിനിധീകരിച്ച ഞങ്ങളുടെ അവിശ്വസനീയമായ അത്‌ലറ്റുകളുമായി ആശയവിനിമയം നടത്തി. അവരുടെ എണ്ണമറ്റ നേട്ടങ്ങൾ  കായികതാരങ്ങൾക്കും യുവതലമുറയ്ക്കും പ്രചോദനം നൽകുന്നു,'  കായികതാരങ്ങളുമായുള്ള കൂടിക്കാഴിച്ചയ്ക്ക് ശേഷം പ്രധാനമന്ത്രി കുറിച്ചു.

'കഴിഞ്ഞ 60 വർഷത്തിനിടയിലെ എക്കാലത്തെയും മികച്ച പ്രകടനമായ 107 മെഡലുകളുടെ ഏറ്റവും ഉയർന്ന നേട്ടം നമ്മുടെ കായികതാരങ്ങൾ നാട്ടിലെത്തിച്ചതിൽ രാജ്യം മുഴുവൻ ആഹ്ളാദത്തിലാണെന്നും പ്രധാനമന്ത്രി പറഞ്ഞു.

2023ലെ ഏഷ്യൻ ഗെയിംസിൽ 107 മെഡലുകൾ നേടിയാണ് ഇന്ത്യ ചരിത്രം കുറിച്ചത്. 28 സ്വര്‍ണവും 38 വെള്ളിയും 41 വെങ്കലവുമാണ് ഇന്ത്യ സ്വന്തമാക്കിയത്.

 2018 ൽ ജക്കാര്‍ത്തയില്‍ നേടിയ 70 മെഡലുകളായിരുന്നു ഇതുവരെയുള്ള റെക്കോഡ്.

107 മെഡലുകളുമായി ഇത്തവണ നാലാം സ്ഥാനത്താണ് ഇന്ത്യ. 1962-ലെ ജക്കാർത്ത ഏഷ്യൻ ഗെയിംസിൽ മൂന്നാം സ്ഥാനത്തെത്തിയതിന് ശേഷം ഇന്ത്യ എത്തുന്ന ഉയർന്ന റാങ്കിങ്ങാണിത്. 

2018 ജക്കാര്‍ത്ത ഏഷ്യന്‍ ഗെയിംസില്‍ ഇന്ത്യ ആകെ 70 മെഡലുകളായിരുന്നു നേടിയത്. അതില്‍ 16 സ്വര്‍ണവും 23 വെള്ളിയും 31 വെങ്കലവും ഉള്‍പ്പെട്ടു