ഡിഎംകെയിൽ നിന്ന് കോൺഗ്രസ് വഴി ബിജെപിയിലേക്ക്; ഖുശ്ബുവിന്‍റെ രാഷ്ട്രീയ യാത്ര ഇങ്ങനെ

ദിവസങ്ങളായി നീണ്ടു നിന്ന അഭ്യൂഹങ്ങൾക്ക് വിരാമമിട്ട് തെന്നിന്ത്യൻ താരം ഖുശ്ബു കഴിഞ്ഞ ദിവസം ബിജെപിയിൽ ചേർന്നിരുന്നു. എഐസിസി വക്താവായിരുന്ന ഖുശ്ബു പാർട്ടിയുമായി ആറ് വർഷം നീണ്ട ബന്ധം അവസാനിപ്പിച്ചാണ് ബിജെപിയിലേക്ക് ചേക്കേറിയത്.  (Image: Instagram)

അടുത്ത വർഷം നടക്കാനിരിക്കുന്ന തമിഴ്നാട് നിയമസഭാ തെരഞ്ഞെടുപ്പ് മുന്നിൽക്കണ്ടാണ് ഖുശ്ബുവിന്‍റെ ഈ കൂടുമാറ്റം എന്നാണ് വിലയിരുത്തപ്പെടുന്നത്. താരത്തിന്‍റെ ബിജെപി പ്രവേശനം സംബന്ധിച്ച അഭ്യൂഹം ശക്തമായിരിക്കെ എഐസിസി വക്താവ് സ്ഥാനത്ത് നിന്നും കഴിഞ്ഞ ദിവസം കോണ്‍ഗ്രസ് നീക്കം ചെയ്തിരുന്നു. (Image: Instagram)

പിന്നാലെയാണ് രാജിപ്രഖ്യാപനം എത്തിയത്. ജനങ്ങളുടെ പിന്തുണയില്ലാത്തവരും യാഥാർഥ്യ ബോധമില്ലാത്തവരും കോൺഗ്രസിന്‍റെ ഉന്നതതലങ്ങളിലിരുന്ന് പാർട്ടിയെ നിയന്ത്രിക്കുകയാണെന്നും തന്നെ പോലുള്ളവരെ ഒതുക്കുകയാണെന്നുമാണ്  കോൺഗ്രസ് അധ്യക്ഷ സോണിയ ഗാന്ധിക്ക് സമർപ്പിച്ച കത്തിൽ ഖുശ്ബു ആരോപിച്ചത്.

പാർട്ടിക്ക് താഴേതട്ടിലേക്ക് ഇറങ്ങി ചെല്ലാനാകുന്നില്ലെന്നും ആത്മാർത്ഥമായി പ്രവർത്തിക്കുന്നവർ നിരാശയിലാണെന്നും കത്തിൽ ചൂണ്ടിക്കാട്ടിയിരുന്നു.  (Image: Instagram)

രാഷ്ട്രീയ രംഗത്തേക്കിറങ്ങിയ ശേഷം ഖുശ്ബു ഇതാദ്യമായല്ല കൂടുമാറ്റം നടത്തുന്നത്. ഡിഎംകെയിലൂടെയാണ് നടി ആദ്യമായി രാഷ്ട്രീയത്തിലേക്ക് കടക്കുന്നത്. . (Image: Instagram)

2010 ൽ തമിഴ്നാട്ടിൽ അന്നത്തെ ഭരണകക്ഷിയായ ഡിഎംകെയിൽ ചേർന്നാണ് ഖുശ്ബു രാഷ്ട്രീയ ജീവിതം ആരംഭിച്ചത്. പാർട്ടി നേതൃത്വവുമായുണ്ടായ ചില ഭിന്നതകളെ തുടർന്ന്  നാലു വർഷത്തിന് ശേഷം 2014ൽ അവർ ഡിഎംകെ വിട്ടു. (Image-PTI)

തുടർന്നാണ് കോൺഗ്രസ് പ്രവേശനം. 2014 നവംബർ 26ന് കോണ്‍ഗ്രസ് നേതാക്കളായ രാഹുൽ ഗാന്ധിയെയും സോണിയാ ഗാന്ധിയെയും സന്ദർശിച്ച ഖുശ്ബു, അധികം വൈകാതെ തന്നെ കോൺഗ്രസ് അംഗമായി. പാർട്ടിയുടെ വക്താവായി നിയമിതയാവുകയും ചെയ്തു. . (Image: PTI)

കോൺഗ്രസുമായി ആറുവർഷം നീണ്ട ബന്ധം ഉപേക്ഷിച്ച് ഇപ്പോൾ ബിജെപിയിലേക്കും. തമിഴ്നാട്ടിൽ വേരുറപ്പിക്കാൻ ശ്രമിക്കുന്ന ബിജെപിക്ക് ഇവിടെ ജനസ്വാധീനമുള്ള ഒരാളെ നേതൃനിരയിൽ ആവശ്യമുണ്ടായിരുന്നു. ആ സാഹചര്യത്തിൽ കൂടിയാണ് ഖുശ്ബു ആ സ്ഥാനത്തേക്കെത്തുന്നത്. ഇവരുടെ താര മൂല്യവും പ്രശസ്തിയും പാർട്ടിക്ക് ഗുണം ചെയ്യുമെന്നാണ് വിശ്വാസം . (Image: Instagram)

കഴിഞ്ഞ ദിവസം ഡൽഹിയിലെ പാർട്ടി ആസ്ഥാനത്ത് ബി.ജെ.പി ദേശീയ ജനറൽ സെക്രട്ടറി സി.ടി രവിയിൽ നിന്നും ഖുശ്ബു പ്രാഥമിക അംഗത്വം സ്വീകരിച്ചു. ബി ജെ പി തമിഴ്നാട് സംസ്ഥാന അധ്യക്ഷൻ എൽ മുരുഗന്റെ സാന്നിദ്ധ്യത്തിലാണ് ഖുശ്ബു അംഗത്വം സ്വീകരിച്ചത്. (Image-Instagram)

ഐ.ആർ.എസ് ഓഫീസറായിരുന്ന ശരവണൻ കുമാരനും മാധ്യമ പ്രവർത്തകൻ മദൻ രവിചന്ദ്രനും ഖുശ്ബുവിനൊപ്പെ ബി.ജി.പി അംഗത്വം സ്വീകരിച്ചു. (Image: PTI)