IPL 2020| 'ദുബായ് ചൂടാണ്'; യുഎഇയിൽ എത്തിയതിനു പിന്നാലെ രാജസ്ഥാൻ താരം ബെൻ സ്റ്റോക്ക് കുറിച്ചതിങ്ങനെ

ദുബായ്: ഐപിഎൽ 13ാം സീസണിൽ പങ്കെടുക്കുന്നതിനായി രാജസ്ഥാൻ റോയൽസിലെ ഇംഗ്ലണ്ട് ഓൾ റൗണ്ടർ ബെൻ സ്റ്റോക്സ് ദുബായിലെത്തി.

ന്യൂസിലാൻഡിൽ കുടുംബത്തോടൊപ്പമായിരുന്നതിനാൽ ആദ്യമത്സരങ്ങൾ സ്റ്റോക്ക്സിന് നഷ്ടമായിരുന്നു.

മസ്തിഷ്ക ക്യാൻസറുമായി പോരാടുന്ന പിതാവിനൊപ്പം സമയം ചെലവഴിക്കാൻ സ്റ്റോക്സ് കഴിഞ്ഞ മാസമാണ് ക്രൈസ്റ്റ്ചർച്ചിൽ എത്തിയത്.

പാകിസ്ഥാനെതിരായ മത്സരത്തിനിടെയാണ് അദ്ദേഹം ന്യൂസിലാൻഡിൽ എത്തിയത്.

ആദ്യ ടെസ്റ്റിനുശേഷം ഓഗസ്റ്റിൽ സ്റ്റോക്സ് ന്യൂസിലൻഡിലേക്ക് പുറപ്പെട്ടു, തുടർന്നുള്ള രണ്ട് ടെസ്റ്റുകളിലും സ്റ്റോക്സ് കളിച്ചില്ല. ഓസ്‌ട്രേലിയയുമായുള്ള ഏകദിന-ടി20 പരമ്പരയിലും അദ്ദേഹം കളിച്ചിരുന്നില്ല.

കോവിഡ് പ്രോട്ടോക്കോൾ അനുസരിച്ച് ആറ് ദിവസത്തെ ക്വാറന്റീന് ശേഷമാകും സ്റ്റോക്സ് ടീമിനൊപ്പം ചേരുന്നത്. ഞായറാഴ്ച ദുബായിലെത്തിയ സ്റ്റോക്സ് ഇക്കാര്യം ഇൻസ്റ്റഗ്രാം പോസ്റ്റിലൂടെ വ്യക്തമാക്കിയിരുന്നു. ദുബായ് ചൂടാണ് എന്നാണ് സ്റ്റോക്സ് കുറിച്ചത്.

സ്റ്റോക്സ് മടങ്ങിയെത്തിയത് രാജസ്ഥാന് ബാറ്റിംഗ് നിരയ്ക്കും ബൗളിംഗ് നിരയ്ക്കും ഒരുപോലെ കരുത്താകും. നിലവിൽ സഞ്ജു സാംസണും സ്റ്റീവ് സ്മിത്തുമാണ് രാജസ്ഥാൻ ബാറ്റിംഗ് നിരയുടെ കരുത്ത്.

നാല് മത്സരങ്ങളിൽ രണ്ടെണ്ണം ജയിച്ച രാജസ്ഥാൻ പോയിന്റ് പട്ടികയിൽ ആറാം സ്ഥാനത്താണ്. രാജസ്ഥാന്റെ അടുത്ത മത്സരം മുംബൈക്കെതിരെയാണ്. ചൊവ്വാഴ്ച അബുദാബി ഷെയ്ഖ് സയ്യിദ് സ്റ്റേഡിയത്തിലാണ് മത്സരം.