ലോക്ക്ഡൗണിനിടെ സര്‍വീസ് നടത്തിയ അഞ്ച് സ്വകാര്യബസ്സുകള്‍ അടിച്ചുതകര്‍ത്തു; പൊലീസ് അന്വേഷണം തുടങ്ങി

ലോക്ക്ഡൗണിനിടെ സർവീസ് നടത്തിയ സ്വകാര്യ ബസുകൾക്ക് നേരെ ആക്രമണം. ബുധനാഴ്ച സര്‍വീസ് നടത്തിയ  അഞ്ചു ബസുകളാണ് തകർത്തത്. ഇന്നലെ രാത്രിയിലായിരുന്നു ബസുകൾക്കു നേരെ ആക്രമം.

സർക്കാർ നിർദ്ദേശപ്രകാരം ഇന്നലെ ഓടിയ അഞ്ചോളം ബസുകളാണ് സാമൂഹ്യവിരുദ്ധർ അടിച്ചുതകർത്തത്. കോഴിക്കോട് എരഞ്ഞിമാവിലും മാവൂരിലും കൂളിമാട് പി എച്ച് ഡി യിലും നിറുത്തിയിട്ട ബസുകൾക്കു നേരെയായിരുന്നു അക്രമം.

കൊളക്കാടൻ ഗ്രൂപ്പിൻറെ  2 ബസ്സും ബനാറസ് ഗ്രൂപ്പിൻറെ ഒരു പ്രൈവറ്റ് ബസ്സും ഒരു ടൂറിസ്റ്റ് ബസ്സും എം.എ.ആർ ബസുമാണ് അടിച്ചുതകർത്തത്. 

ബസിൻ്റെ മുൻഭാഗത്തെ ചില്ലുകൾ അടിച്ചു തകർത്ത് ശേഷം കേടുപാടുകൾ വരുത്തുകയായിരുന്നു.

സ്വകാര്യ ബസുടമ സംഘടനകളുടെ തീരുമാനത്തിന് വിരുദ്ധമായി സർവ്വീസ് നടത്തിയ ബസുകളാണ് ആക്രമിക്കപ്പെട്ടത്. സംഭവത്തിൽ പൊലീസ് കേസെടുത്ത് അന്വേഷണം ആരംഭിച്ചു.

അറുബസുകളായിരുന്നു ആദ്യ ദിവസം കോഴിക്കോട്ട് നിരത്തിലിറങ്ങിയത്. ഓരോ ബസിനും മൂവായിരം രൂപ നഷ്ടം സഹിച്ചാണ് ആദ്യ ദിവസം ഓടിയതെന്ന് ഉടമകൾ പറയുന്നു.