കോവിഡ് 19: സർക്കാർ ജീവനക്കാർ ഒരു മാസത്തെ ശമ്പളം ദുരിതാശ്വാസ നിധിയിലേക്ക് നൽകണം: മുഖ്യമന്ത്രി

തിരുവനന്തപുരം: ലോക്ക് ഡൗൺ പശ്ചാത്തലത്തിൽ സർക്കാർ ജീവനക്കാർ ഒരുമാസത്തെ ശമ്പളം  മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നൽകണമെന്ന് മുഖ്യമന്ത്രി പിണറായി വിജയൻ നിർദ്ദേശിച്ചു.

മുഖ്യമന്ത്രി ഇന്ന് വിളിച്ചുചേര്‍ത്ത സർവീസ് സംഘടനാ നേതാക്കന്മാരുടെ യോഗത്തിലാണ് പുതിയ നിർദേശം മുന്നോട്ടു വച്ചത്.

ഗുരുതരമായ സാമ്പത്തിക പ്രതിസന്ധിയ്ക്കിടെ സൗജന്യ റേഷൻ വിതരണം ഉൾപ്പെടെയുള്ളവയ്ക്കായി കോടിക്കണക്കിന് രൂപയാണ് സർക്കാരിന് അധികമായി കണ്ടെത്തേണ്ടത്.

ഈ സാഹചര്യത്തിലാണ് സഹായം അഭ്യർത്ഥിക്കുന്നതെന്നും മുഖ്യമന്ത്രി യോ​ഗത്തിൽ പറ‍ഞ്ഞു. മുഖ്യമന്ത്രി മുന്നോട്ടു വച്ച നിർദ്ദേശത്തോ‌‌ട് സംഘടനാ നേതാക്കൾ അനുകൂല നിലപാടാണ് സ്വീകരിച്ചത്.

എന്നാൽ നിർബന്ധിത പിരിവാകരുതെന്ന നിർദ്ദേശം പ്രതിപക്ഷ സർവീസ് സംഘടനകൾ മുന്നോട്ടുവച്ചു. താഴെ തട്ടിലുള്ള ജീവനക്കാരെ ഇതിൽ നിന്ന് ഒഴിവാക്കണമെന്നും എൻജിഒ അസോസിയേഷൻ ആവശ്യപ്പെട്ടു.

മുഖ്യമന്ത്രിയുടെ നിർദ്ദേശം സംബന്ധിച്ച് കമ്മിറ്റികളില്‍ കൂടിയാലോചിച്ച ശേഷം തീരുമാനം അറിയിക്കാമെന്നാണ് സർവീസ് സംഘടനകൾ അറിയിച്ചിരിക്കുന്നത്.