വില്ലൻ ആശിഷ് വിദ്യാർഥി സ്റ്റാൻഡ്-അപ്പ് കോമഡിയിലാണ്.

പല ഭാഷകളിലായി നിരവധി വില്ലൻ വേഷങ്ങളിൽ നിറഞ്ഞാടിയ നടൻ ആശിഷ് വിദ്യാർഥി പക്ഷേ യഥാർത്ഥത്തിൽ എന്നും ഏറെ സംസാരിക്കാനിഷ്ടപ്പെടുന്ന, ചിരിക്കാനും ചിരിപ്പിക്കാനും ശീലമാക്കിയ വ്യക്തിയാണ്.

ഇടക്കെപ്പോഴും തൻ്റെ നിറഞ്ഞ ജീവിതത്തിലെ വാർത്തകളുമായി സോഷ്യൽ മീഡിയ വ്ളോഗർ കൂടിയായ അദ്ദേഹം ശ്രദ്ദപറ്റാറുണ്ട്. ഇപ്പോഴിതാ തൻ്റെ ഹാസ്യ അഭിരുചി കണ്ടെത്തി അദ്ദേഹം സ്റ്റാൻഡ്-അപ്പ് കോമഡിയിൽ ഒരു പുതിയ കരിയർ തന്നെ ആരംഭിച്ചിരിക്കുന്നു.

കഴിഞ്ഞ ഒരു മാസമായി താരം “സിറ്റ് ഡൗൺ ആശിഷ്” സ്റ്റാൻഡ്-അപ്പ് കോമഡി സ്‌പെഷ്യലുമായി രാജ്യത്തിൻ്റെ പല ഭാഗങ്ങളിലായി പര്യടന നടത്തുന്നു.തൻ്റെ ജീവിതത്തിൽ നിന്നുള്ള ഉല്ലാസകരമായ സംഭവങ്ങൾ ഉൾക്കൊള്ളുന്ന ഒരു മണിക്കൂർ ദൈർഘ്യമുള്ള ക്ലീൻ കോമഡി ഷോ എന്ന നിലയിലാണ് ആശിഷ് ഷോ അവതരിപ്പിക്കുന്നത്.

ഇപ്പോഴിതാ ചിരിയിൽ ചേർത്ത ചിന്തകളും കഥകളുമായി നടൻ ആശിഷ് വിദ്യാർഥി  കൊല്ലം 8 പോയിന്റ് ആർട് കഫെയിൽ നടത്തിയ സ്റ്റാൻഡ് അപ് കോമഡി കാഴ്ചക്കാർക്ക്  വേറിട്ട അനുഭവം സമ്മാനിച്ചിരിക്കുന്നു. കന്യാകുമാരി മുതൽ കശ്മീർ വരെ ‘റെയ്നിങ് സ്മൈൽസ്’ എന്ന പേരിൽ സംഘടിപ്പിക്കുന്ന സ്റ്റാൻഡ് അപ് കോമഡി ഷോയുടെ ഭാഗമായാണ് ആശിഷ് വിദ്യാർഥി കൊല്ലത്തെത്തിയത്.

“ഇന്നത്തെ യുവതലമുറ ഭാഗ്യം കുറഞ്ഞവരാണ്. അവർ എന്തു ചെയ്താലും വിലയിരുത്താനും അഭിപ്രായം പറയാനും വിധി എഴുതാനും ഒട്ടേറെ പേരുണ്ടാവും. എന്നാൽ എന്നെപ്പോലെയുള്ള അറുപത് വയസ്സുള്ളവർ എന്തു ചെയ്താലും ഈ പ്രായത്തിലും ഇതൊക്കെ ചെയ്യുന്നുണ്ടല്ലോ എന്ന അഭിപ്രായം മാത്രമാണ് കേൾക്കേണ്ടി വരിക.”- ആശിഷ് വിദ്യാർഥി പറഞ്ഞു.