പക്ഷിപ്രേമികൾക്ക് അത്യപൂർവ്വ കാഴ്ചയൊരുക്കി തൊളിക്കോട് എൽ പി സ്കൂൾ

തൊളിക്കോട് ഗവ. എൽ പി സ്കൂളിൽ അപൂർവ്വ പക്ഷികളുടെ ചിത്രപ്രദർശനം ഇന്ന് നടന്നു.

പാഠ്യപാഠ്യേതര വിഷയങ്ങളിൽ നൂതന ആശയങ്ങൾ ആവിഷ്കരിച്ച് നടപ്പിലാക്കി ശ്രദ്ധേയമായ സ്കൂളാണ് തൊളിക്കോട് സർക്കാർ എൽ പി സ്കൂൾ.

പാഠഭാഗവുമായി ബന്ധപ്പെട്ടാണ് അപൂർവ്വ ഇനം പക്ഷികളുടെ ചിത്രപ്രദർശനം സ്കൂളിൽ സംഘടിപ്പിച്ചത്.

കേരളത്തിൽ കണ്ടു വരുന്ന വ്യത്യസ്തങ്ങളായ നൂറിൽ പരം പക്ഷികളുടെ ചിത്രപ്രദർശനം പുനലൂർ നഗരസഭാ ചെയർപേഴ്സൺ കെ. പുഷ്പലത ഉദ്ഘാടനം ചെയ്തു.

പുനലൂർ സ്വദേശിയും മികച്ച പക്ഷി നിരീക്ഷകനുമായ ബ്രൈറ്റ് റോയിയുടെയും പത്തനംതിട്ട ബേഡേഴ്സിൻ്റയും അപൂർവ്വ പക്ഷിചിത്രങ്ങൾ പ്രദർശനത്തിനുണ്ടായിരുന്നു.

പാഠഭാഗത്തിലെ പക്ഷികളെ കുറിച്ചുള്ള വിഷയം ചിത്രപ്രദർശനത്തിലൂടെ അവതരിപ്പിച്ചപ്പോൾ വിദ്യാർഥികൾക്ക് കൗതുകമാണ് ഉണ്ടായത്. പക്ഷികളെ അടുത്തറിയാനും ആശയങ്ങൾ പങ്കുവയ്ക്കാനും പ്രദർശനത്തിലൂടെ കൊച്ചു കൂട്ടുകാർക്ക് സാധ്യമായി.