പെരുമ്പാവൂരിലും പായിപ്പാട്ട് മോഡൽ; ഭക്ഷണം ലഭിച്ചില്ലെന്ന് ആരോപിച്ച് അതിഥി തൊഴിലാളികളുടെ പ്രതിഷേധം

കൊച്ചി: ആവശ്യത്തിന് ഭക്ഷണം ലഭിച്ചില്ലെന്ന് ആരോപിച്ച് പെരുമ്പാവൂരിലും അതിഥി തൊഴിലാളികളുടെ പ്രതിഷേധം. ബംഗാൾ കോളനിയിലെ നൂറിലധികം പേരാണ് പ്രതിഷേധവുമായി രംഗത്തെത്തിയത്.

പെരുമ്പാവൂർ ബംഗാൾ കോളനിയിലെ അതിഥി തൊഴിലാളികളാണ് ഉച്ചയ്ക്ക് പ്രതിഷേധവുമായി എത്തിയത്.ആവശ്യത്തിന് ഭക്ഷണം തികഞ്ഞില്ലെന്നാണ് പരാതി.

അതേസമയം ആവശ്യത്തിന് ഭക്ഷണമൊരുക്കിയിട്ടുണ്ടെന്നും തൊഴിലാളികളെ തെറ്റിദ്ധരിപ്പിക്കാൻ ശ്രമം നടക്കുന്നുവെന്നും മന്ത്രി വി എസ് സുനിൽകുമാർ ആരോപിച്ചു.

ബംഗാൾ കോളനിയിലെ തൊഴിലാളികൾക്ക് ആവശ്യത്തിന് ഭക്ഷണം ഒരുക്കിയിരുന്നുവെന്ന് അധികൃതർ പറഞ്ഞു. എന്നാൽ മറ്റിടങ്ങളിൽ നിന്ന് ആളുകൾ ഇവിടെ എത്തി ഭക്ഷണം കഴിയ്ക്കുകയും ചെയ്തിരുന്നു.

ചോറും പരിപ്പ് കറിയുമാണ് അതിഥി തൊഴിലാളികൾക്ക് തയ്യാറാക്കിയിരുന്നത്. എന്നാൽ ചപ്പാത്തി വേണമെന്നും തൊഴിലാളികൾ നിർബന്ധം പിടിയ്ക്കുകയും ചെയ്തു.

പൊലീസും ജനപ്രതിനിധികളും എത്തിയാണ് തൊഴിലാളികളെ അനുനയിപ്പിച്ച് തിരിച്ചയച്ചത്.

പ്രതിഷേധം ഉയർന്ന പശ്ചാത്തലത്തിൽ മന്ത്രി വി എസ് സുനിൽകുമാറും ജില്ലാ കളക്ടർ എസ് സുഹാസും സ്ഥലത്തെത്തി. തൊഴിലാളികൾക്ക് ഭക്ഷണം നൽകുന്നതിൽ വീഴ്ച്ച ഉണ്ടായിട്ടില്ലെന്ന് വി എസ് സുനിൽ കുമാർ പറഞ്ഞു.

തൊഴിലാളികളെ തെറ്റിദ്ധരിപ്പിക്കാൻ ശ്രമം നടക്കുന്നുവെന്നും വി എസ് സുനിൽകുമാറും ആരോപിച്ചു. അതിഥി തൊഴിലാളികൾക്ക് ഭക്ഷണം കൊടുക്കുന്നതിന് മാത്രമായി കമ്യൂണിറ്റി കിച്ചൻ പെരുമ്പാവൂരിൽ ഒരിക്കിയിട്ടുണ്ട്.