'ഗുരുവായൂരിലെ ദേവ ചൈതന്യം അപാരം' ഓരോ ഇന്ത്യാക്കാരന്‍റെയും സന്തോഷത്തിനും സമൃദ്ധിക്കുമായി പ്രാര്‍ത്ഥിച്ചു; പ്രധാനമന്ത്രി

ഗുരുവായൂര്‍ ക്ഷേത്രത്തില്‍ ദര്‍ശനം നടത്തിയ അനുഭവം പങ്കുവെച്ച് പ്രധാനമന്ത്രി നരേന്ദ്രമോദി. കണ്ണനെ കണ്ണുനിറയെ കണ്ടുതൊഴുത അദ്ദേഹം താമരപ്പൂക്കള്‍ കൊണ്ടുള്ള തുലഭാരം നടത്തിയാണ് ദര്‍ശനം പൂര്‍ത്തിയാക്കിയത്. 

ഗുരുവായൂര്‍ ക്ഷേത്ര തന്ത്രി ചേന്നാസ് ദിനേശന്‍ നമ്പൂതിരിപ്പാടും മറ്റ് ശാന്തിക്കാരും ചേര്‍ന്ന് പ്രധാനമന്ത്രിയെ പ്രധാന ഗോപുരത്തിന് മുന്‍പില്‍ വെച്ച് പൂര്‍ണകുംഭം നല്‍കി സ്വീകരിച്ചു.

ക്ഷേത്രദർശനത്തിന് ശേഷം നരേന്ദ്ര മോദിക്ക് ഗുരുവായൂര്‍ ദേവസ്വം അധികൃതര്‍ ഗുരുവായൂരപ്പന്റെ ദാരുശില്‍പ്പവും സമ്മാനിച്ചു. 

'ഗുരുവായൂർ ക്ഷേത്രത്തിൽ പ്രാർത്ഥന നടത്തി. ഈ ക്ഷേത്രത്തിന്റെ ദൈവിക ഊർജ്ജം അപാരമാണ്. ഓരോ ഇന്ത്യക്കാരനും സന്തോഷത്തോടെയും സമൃദ്ധിയോടെയും ആയിരിക്കാൻ ഞാൻ പ്രാർത്ഥിച്ചു'- മോദി സമൂഹ മാധ്യമങ്ങളില്‍ കുറിച്ചു. 

നടനും ബിജെപി നേതാവുമായ  സുരേഷ് ഗോപിയുടെ മകള്‍ ഭാഗ്യയുടെ വിവാഹത്തില്‍ പങ്കെടുക്കാനാണ് മോദി ഗുരുവായൂരിലെത്തിയത്.

ഭാഗ്യക്കും വരന്‍ ശ്രേയസിനും വരണമാല്യം എടുത്ത് നല്‍കിയത് മോദിയായിരുന്നു.

ഇവര്‍ക്കൊപ്പം തൊട്ടടുത്ത മണ്ഡപങ്ങളില്‍ വിവാഹിതരനായ നവദമ്പതികള്‍ക്ക് പ്രധാനമന്ത്രി അക്ഷതം നല്‍കി ആശംസകള്‍ അറിയിച്ചു.

വിവാഹത്തില്‍ പങ്കെടുക്കാനെത്തിയ നടന്‍ മോഹന്‍ലാല്‍, മമ്മൂട്ടി, ജയറാം, ബിജു മേനോന്‍, ദിലീപ്, സംവിധായകന്‍ ഷാജി കൈലാസ് എന്നിവരെയും മോദി കണ്ടു.

മോഹന്‍ലാലിന് പ്രധാനമന്ത്രി അക്ഷതം കൈമാറി. 

പിന്നാലെ തൃപ്രയാര്‍ ശ്രീരാമക്ഷേത്രത്തിലെത്തിയ പ്രധാനമന്ത്രി തൃപ്രയാര്‍ തേവരെ വണങ്ങി പ്രധാന വഴിപാടായ മീനൂട്ടും നടത്തി. വേദപഠിതാക്കള്‍ നടത്തിയ വേദമന്ത്രാര്‍ച്ചനയിലും ഭജനയിലും മോദി പങ്കെടുത്തു.