പരാതിയുണ്ടെങ്കിൽ ഗവർണറെ അറിയിക്കാം; എം.ജിയിൽ ബിരുദം റദ്ദാക്കിയവരുടെ ഭാഗം കേൾക്കും

എംജി സർവകലാശാലയിൽ ചട്ടവിരുദ്ധ മാർക്ക്ദാനത്തിലൂടെ വിജയം നേടിയ വിദ്യാർഥികളുടെ ഭാഗം കേൾക്കാൻ   സർവകലാശാല തീരുമാനിച്ചു.

മാർക്ക് ലിസ്റ്റ് റദ്ദാക്കിയതിൽ പരാതിയുണ്ടെങ്കിൽ സർവകലാശാല ചാൻസിലർ കൂടിയായ ഗവർണറെ അറിയിക്കാനാണ് നിർദേശം. ബിടെക് പരീക്ഷയിൽ മാർക്ക് ദാനത്തിലൂടെ വിജയിച്ച 118 വിദ്യാർഥികൾക്ക് ഇതുസംബന്ധിച്ച മെമ്മോ സർവകലാശാല കൈമാറി.

മെമ്മോ ലഭിച്ച് പതിനഞ്ച് ദിവസത്തിനകം ഗവർണർക്ക് പരാതികൾ എഴുതി നൽകണമെന്നാണ് നിർദ്ദേശിച്ചിരിക്കുന്നത്.

വിദ്യാർഥികളുടെ ഭാഗം കേൾക്കാതെയാണ് സർട്ടിഫിക്കറ്റുകൾ റദ്ദാക്കിയതെന്ന് പരാതി ഉയർന്നിരുന്നു. കോടതിയെ സമീപിച്ചാൽ പിന്നീട് തിരിച്ചടിയുണ്ടായേക്കുമെന്നും സർവകലാശാല വിലയിരുത്തുന്നു. ഇതിൻറെ ഭാഗമായാണ് തുടർ നടപടി.

അപ്രതീക്ഷിതമായി സർട്ടിഫിക്കറ്റ് റദ്ദാക്കിയതോടെ നിരവധി വിദ്യാർഥികളുടെ ജോലിയെയും തുടർ പഠനത്തെയും ഇത് ബാധിച്ചിരുന്നു. ഇക്കാര്യം ചൂണ്ടിക്കാട്ടി വിദ്യാർത്ഥികൾ ഗവർണറെ സമീപിക്കുകയും ചെയ്തിരുന്നു. അതേസമയം വിഷയത്തിൽ ഗവർണറുടെ തീരുമാനം അന്തിമമായിരിക്കും.