സൊമാറ്റോ പ്ലാറ്റ്‌ഫോം ഫീസിൽ വർദ്ധനവ്; ഓരോ ഓർഡറിനും ഇനി അധികം നൽകേണ്ടത് 2.40 രൂപ

അസംസ്‌കൃത എണ്ണവില വർദ്ധിക്കുന്നത് സൊമാറ്റോയിൽ ലിസ്റ്റ് ചെയ്തിട്ടുള്ള റെസ്റ്റോറന്റുകളുടെയും ഡെലിവറി പങ്കാളികളുടെയും പ്രവർത്തനങ്ങളെ ബാധിച്ചേക്കാം എന്ന സാഹചര്യത്തിലാണ് ഈ വിലവർദ്ധനവെന്നാണ് സൂചന. അർബൻ മൊബിലിറ്റി സ്റ്റാർട്ടപ്പായ റാപ്പിഡോ 'ഓൺലി' (Ownly) എന്ന പേരിൽ തങ്ങളുടെ ഭക്ഷണ വിതരണ സേവനം ബെംഗളൂരുവിൽ ആരംഭിച്ച സാഹചര്യത്തിലാണ് സൊമാറ്റോയുടെ ഈ നീക്കമെന്നും റിപ്പോർട്ടുകളുണ്ട്. ഇതിനുമുമ്പ് 2025 സെപ്റ്റംബറിലായിരുന്നു ഇത്തരമൊരു വർദ്ധനവ് നടപ്പിലാക്കിയത്. സൊമാറ്റോയുടെ എതിരാളികളായ സ്വിഗ്ഗി നിലവിൽ ഓരോ ഓർഡറിനും 14.99 രൂപയാണ് ഈടാക്കുന്നത്.

അതേസമയം, എൽപിജി വിതരണത്തിലുണ്ടായ തടസ്സങ്ങൾ റെസ്റ്റോറന്റുകളെ ബാധിച്ചിട്ടുണ്ടെന്നും ഇത് ഭക്ഷണ വിതരണത്തിന്റെ അളവ് കുറയ്ക്കാൻ സാധ്യതയുണ്ടെന്നും കോട്ടക് സെക്യൂരിറ്റീസ് പറഞ്ഞു. എന്നാൽ ഡെലിവറി ചിലവുകൾ നിലവിൽ സ്ഥിരമായി തുടരുകയാണ്. വിതരണ ശൃംഖലയിലെ വെല്ലുവിളികൾ ഇറ്റേണലിനേക്കാൾ കൂടുതൽ സ്വിഗ്ഗിയെയാണ് ബാധിക്കുന്നതെന്നും റിപ്പോർട്ട് വ്യക്തമാക്കുന്നു. ആഗോളതലത്തിലെ പ്രതിസന്ധികൾ മാറുന്നതോടെ ഇറ്റേണൽ ലിമിറ്റഡ് മികച്ച നേട്ടം കൈവരിക്കുമെന്നാണ് വിപണി വിദഗ്ധരുടെ വിലയിരുത്തൽ.