ചായം പൂശിയ നേപ്പാൾ യാത്ര ; ചിത്രകലാ യാത്രാവിവരണവുമായി മൂന്നു യാത്രികർ

യാത്രാ വിവരണത്തിന് ചിത്രകല മാതൃകയാക്കുകയാണ് മൂന്ന് ചിത്രകാരന്മാർ. നേപ്പാൾ യാത്രയിൽ കണ്ട കാഴ്ചകളാണ് ക്യാൻവാസിൽ പതിഞ്ഞത്. യാത്രയുടെ ഹൃദയഹാരിയായ അനുഭവങ്ങളാണ് കാഴ്ചക്കാരന് മുന്നിൽ വരകളായി മാറുന്നത്.

യാത്രാനുഭവങ്ങൾ പുസ്തകമാക്കി മാറ്റി അനുഭവപ്പെടുത്തിയ എഴുത്തുകാർ നമുക്കേറെയുണ്ട്. എന്നാൽ യാത്രയിൽ കണ്ട കാഴ്ചകൾ വരച്ച് രേഖപ്പെടുത്തുന്നവർ അപൂർവ്വമാവും.

വടകര സ്വദേശികളായ ജഗദീഷ് പാലയാട്ട്, കെ.വി. ശ്രീജേഷ്, കോഴിക്കോട് സ്വദേശി ശ്രീകുമാർ മാവൂർ എന്നിവരാണ് നേപ്പാൾ സന്ദർശനാനുഭവങ്ങൾ ചിത്രങ്ങളായി രൂപപ്പെടുത്തിയത്. തത്സമയം വരച്ച 55 ചിത്രങ്ങളുൾപ്പെടെ എഴുപത് ചിത്രങ്ങളാണ് പ്രദർശിപ്പിക്കുന്നത്.

ദക്ഷിണേന്ത്യൻ രാജ്യങ്ങളുടെ സാംസ്കാരിക വിനിമയത്തിൻ്റെ ഭാഗമായി കഴിഞ്ഞ മാർച്ചിൽ നേപ്പാളിൻ്റെ തലസ്ഥാനമായ കാഠ്മണ്ട് മുതൽ സാരങ്കോട്ട് വരെ ഏകദേശം 250 കി.മീ ആയിരുന്നു യാത്ര.

അവർ നേരിട്ട അനുഭവിച്ച പ്രകൃതിഭംഗികളും തെരുവുകളും യാത്രാ സ്മരണ കാഴ്ചകളായി അതിമനോഹരമായി അവതരിപ്പിച്ചിരിക്കുകയാണ്.

നേപ്പാളിലെ പ്രകൃതിഭംഗിയും തെരുവുകളും ജനങ്ങളുമെല്ലാം പകർത്തി. വടകരയിൽ ഈ ചിത്രകലാ പ്രദർശനം നടക്കുകയാണ്. തുടർന്ന് കോഴിക്കോടും സഞ്ചാര ചിത്രകല പ്രദർശനത്തിന് വെക്കും.