അധ്യാപികയിൽ നിന്ന് വീട്ടമ്മ; ഇപ്പൊ മിസ് ടീൻ എർത്തിൽ തിളങ്ങിയ ഡിസൈനറായി ദീപ്തി സെബാസ്റ്റ്യൻ

ദീപ്തിയുടെ കരവിരുതിൽ വിരിഞ്ഞ വസ്ത്രമണിഞ്ഞ് ഐശ്വര്യ നടന്നുകയറിയത് മിസ് ടീൻ എർത്ത് പട്ടത്തിലേക്ക്. കോസ്റ്റ്യും റൗണ്ടിൽ ഐശ്വര്യ അണിഞ്ഞ വസ്ത്രം വിധിനിർണയത്തിൽ നിർണായകമായപ്പോൾ ദീപ്തി സെബാസ്റ്റ്യൻ എന്ന ഡിസൈനറുടെ കഴിവു കൂടിയാണ് ലോകം അറിഞ്ഞത്...

കസവ് നിറത്തിൽ പ്രത്യേകം നെയ്തെടുത്ത പാവാടയും ബ്ലൗസും..ചാരുത പകർന്ന് ബീഡ്സ്, സ്റ്റോൺ വർക്കുകൾ.. തെളിഞ്ഞു നിൽകുന്ന മ്യൂറൽ പെയിന്റിംഗ്.. പിന്നിൽ കേരളത്തനിമ വിളിച്ചോതുന്ന തെയ്യം....ഐശ്വര്യ വിനു റാംപിലൂടെ ചുവടുവച്ചപ്പോൾ വിധികർത്താക്കളും എല്ലാം മറന്ന് കയ്യടിച്ചു...

രണ്ട് മാസത്തോളം നീണ്ട വിശ്രമമില്ലാത്ത പ്രയത്നം ഉദ്ദേശിച്ച ഫലം കണ്ടപ്പോൾ ദീപ്തിയുടെ സന്തോഷം പറഞ്ഞറിയിക്കാവുന്നതിലും അപ്പുറമായിരുന്നു. ഏറെ നാളായി മനസിൽ താലോലിക്കുന്ന വലിയ സ്വപ്നത്തിന്റെ തുടക്കം യാഥാർഥ്യമായതിന്റെ സന്തോഷം.

പ്രത്യേകം നെയ്തെടുത്ത വസ്ത്രം- ബന്ധു കൂടിയായ ഐശ്വര്യക്ക് മിസ് ടീൻ മത്സരത്തിലേക്ക് കോസ്റ്റ്യൂം തയാറാക്കി നൽകണം എന്ന ആവശ്യം വന്നപ്പോൾ മുതൽ ദീപ്തിയുടെ മനസ് അതിനായി പാകപ്പെടുകയായിരുന്നു. സിംപിൾ ആൻഡ് എലഗന്റ് ആയിരിക്കണം.

പതിവ് ബഹളങ്ങൾക്ക് അപ്പുറം കേരളത്തിന്റെ ഐശ്വര്യം അതിൽ പ്രതിഫലിക്കണം. ദീപ്തിയുടെ മനസിൽ ഡിസൈനുകൾ മിന്നിമറഞ്ഞു. പിന്നെ അധികം വൈകിയില്ല. പാലക്കാട് കൂത്താംപള്ളിയിൽ പോയി നേരിട്ട് നെയ്ത്തുകാരിൽ നിന്ന് നെയ്തെടുത്ത തുണിയിൽ പാവാടയും ബ്ലൗസും തുന്നി. അതിൽ പ്രത്യേകം പറഞ്ഞ് ചെയ്യിച്ച കര വസ്ത്രത്തെ വേറിട്ടതാക്കി. ഒപ്പം ബീഡ്സ് സ്റ്റോൺ വർക്കുകൾ കൂടി വന്നതോടെ വസ്ത്രത്തിന് ദീപ്തി ടച്ച് കൈവന്നു.

വേറിട്ടു നിന്നത് മ്യൂറൽ ചിത്രങ്ങൾ- കസവുനിറത്തിലെ പാവാടയുടെ ഭംഗി നഷ്ടപ്പെടാതെ മ്യൂറൽ ചിത്രം ആലേഖനം ചെയ്യാനുള്ള ദീപ്തിയുടെ ശ്രമവും വിജയം കണ്ടു. കേരളത്തിന്റെ തനിമ വിളിച്ചോതുന്ന കഥകളി രൂപങ്ങളാണ് മ്യൂറൽ ചിത്രമായി കോസ്റ്റ്യൂമിൽ തെളിഞ്ഞു നിന്നത്. ഒരു പാട് പേരിൽ നിന്നും ചിത്രങ്ങൾ ശേഖരിച്ചാണ് അനുയോജ്യമായ പെയിന്റിംഗ് തയാറാക്കിയതെന്ന് ദീപ്തി പറയുന്നു.

പെയിന്റിംഗിന്റെ ഭംഗി ചോരാതെ അതിനു ചുറ്റും ബീഡ്സ്, സ്റ്റോൺ ഹാന്റ് വർക്കുകൾ കൂടി ആയപ്പോൾ കോസ്റ്റ്യൂമിന്റെ ഭംഗി വേറിട്ടതായി. കോസ്റ്റ്യൂമിന് ചേരുന്ന പ്രോപ്പർട്ടിയായി തെയ്യവും ദീപ്തി തയാറാക്കി നൽകി.

അധ്യാപികയിൽ നിന്ന് ഡിസൈനറിലേക്ക്- സ്കൂൾ അധ്യാപികയായിരുന്ന കൊച്ചിക്കാരി ദീപ്തി ജോലി രാജി വച്ച് തന്റെ പാഷന്റെ പിന്നാലെ പോവുകയായിരുന്നു. ആദ്യം ഒരു വെബ്സൈറ്റ് തുടങ്ങി. ഇപ്പോൾ എറണാകുളത്ത് റിവോൾട്ട് എന്ന പേരിൽ ബൂട്ടിക്കും നടത്തുന്നു. ബ്രൈഡൽ, പാർട്ടി വെയർ തുടങ്ങി കസ്റ്റമറിന്റെ ഇഷ്ടാനുസരം വസ്ത്രങ്ങൾ ഒരുക്കുന്നതിൽ സന്തോഷം കണ്ടെത്തുകയാണ് ദീപ്തി ഇപ്പോൾ. എല്ലാ പിന്തുണയും നൽകി ഭർത്താവ് ബിപിൻ ചന്ദ്രനും മക്കളായ ആദിത്യനും അഭയനും.

നസിൽ ഒരുപാട് ആശയങ്ങളുണ്ട്. ഒരു പാട് ദൂരം പോകേണ്ടതുണ്ട്. റിവോൾട്ട് ഒരു ബ്രാൻഡ് ആക്കി മാറ്റണം. അതിനായി നിറമുള്ള സ്വപ്നങ്ങൾ നെയ്ത് മുന്നേറുകയാണ് ദീപ്തി സെബാസ്റ്റ്യൻ.