ആദ്യം കയ്ക്കും പിന്നെ മധുരിക്കും; പാവയ്ക്കയുടെ ഗുണങ്ങൾ അറിഞ്ഞാൽ കയ്പ്പൊന്നും പ്രശ്നമാകില്ല

രുചിയെ കുറിച്ച് ആലോചിക്കുമ്പോൾ എല്ലാവരും ഒഴിവാക്കുന്ന പച്ചക്കറിയാണ് പാവയ്ക്ക. എന്നാൽ, ആരോഗ്യ ഗുണങ്ങളിൽ പാവയ്ക്കെ വെല്ലാൻ മറ്റൊരു പച്ചക്കറിയില്ലെന്ന് തന്നെ പറയാം.

രുചിയെ കുറിച്ചുള്ള സങ്കല്പ്പങ്ങൾ മാറ്റിവെച്ച് ആരോഗ്യത്തിന് മുൻഗണന നൽകിയാൽ പാവയ്ക്കയെ ഒരിക്കലും മാറ്റിനിർ‌ത്തില്ല. പാവയ്ക്കയുടെ ഗുണങ്ങൾ എന്തൊക്കെയാണെന്ന് നോക്കാം.

ജീവകം ബി1, ബി2, ബി3 ജീവകം സി, മഗ്നീഷ്യം, ഫോളേറ്റ് സിങ്ക്, ഫോസ്ഫറസ്, മാംഗനീസ്, ഭക്ഷ്യനാരുകള്‍, കാല്‍സ്യം എന്നിവ ധാരാളമായി പാവയ്ക്കയിൽ അടങ്ങിയിട്ടുണ്ട്. ഇരുമ്പിന്റെയും പൊട്ടാസ്യത്തിന്റേയും കലവറയാണ് ഈ പച്ചക്കറി.

ദിവസവും പാവയ്ക്ക കഴിക്കുന്നത് ചർമരോഗങ്ങളെ അകറ്റി നിർത്തും. ചർമത്തിന്റെ അണുബാധ അകറ്റാനും മുഖക്കുരു മാറാനും പാവയ്ക്ക സഹായിക്കും.

പ്രമേഹ രോഗികള്‍ പാവയ്ക്ക ധാരാളം കഴിക്കുന്നത് നല്ലതാണ്. പാവയ്ക്കയില്‍ ഇന്‍സുലിന്‍ പോലുള്ള പോളിപെപ്റ്റൈ‍ഡ് പി എന്ന പ്രോട്ടീന്‍ ഉണ്ട്. ഇതാണ് ഇന്‍സുലിന്‍റെ പ്രവര്‍ത്തനത്തെ അനുകരിക്കുകയും പ്രമേഹരോഗികളില്‍ രക്തത്തിലെ പഞ്ചസാരയുടെ അളവു കുറയ്ക്കുകയും ചെയ്യുന്നത്.

പാവയ്ക്കയിലുളള ആന്‍റി മൈക്രോബിയല്‍, ആന്‍റി ഓക്സിഡന്‍റ് ഗുണങ്ങള്‍ രക്തം ശുദ്ധമാക്കാന്‍ സഹായിക്കും.

ജീവകം സി ധാരാളമായി അടങ്ങിയിരിക്കുന്നതിനാൽ, രോഗ പ്രതിരോധശേഷി വർധിപ്പിക്കും. പാവയ്ക്ക ജ്യൂസിന്‍റെ ആന്‍റി ഇന്‍ഫ്ലമേറ്ററി ഗുണങ്ങള്‍ രക്തത്തിലെ കൊളസ്ട്രോളിന്‍റെ അളവ് കുറയ്ക്കുന്നു.