അയ്യാ വൈകുണ്ഠ സ്വാമി അവതാര ദിന ഘോഷയാത്ര; കന്യാകുമാരി ജില്ലയിൽ ഇന്ന് അവധി

കന്യാകുമാരി: ജില്ലയിലെ പ്രസിദ്ധമായ സ്വാമിതോപ്പ് അയ്യാ വൈകുണ്ഠ സ്വാമി ക്ഷേത്രത്തിൽ കുംഭമാസ ഉത്സവവും സ്വാമിയുടെ അവതാര ദിനവുമായി ഇന്ന് ആഘോഷിക്കും.ഇന്നലെ രാവിലെ 6ന് തിരിച്ചെന്തൂർ, ഉടൻക്കുടി, ആരൽവാമൊഴി വഴി വാഹന ഘോഷയാത്ര നാഗർകോവിൽ നാഗരാജ ക്ഷേത്ര മൈതാനത്തിൽ എത്തിച്ചേർന്നു

രാവിലെ 9ന് തിരുവനന്തപുരം പത്മനാഭസ്വാമി ക്ഷേത്രത്തിലെ വടക്ക് നിന്നാരംഭിച്ച ഘോഷയാത്ര മാർത്താണ്ഡം വഴി രാത്രി നാഗർകോവിൽ നാഗരാജ ക്ഷേത്ര മൈതാനത്തിലെത്തിച്ചേർന്നു.

ഇന്ന് രാവിലെ 5 മണിക്ക് നാഗരാജാക്ഷേത്ര മൈതാനത്തിൽ നിന്നും കുംഭമാസ ഘോഷയാത്ര സ്വാമി തോപ്പ് വൈകുണ്ഠസ്വാമി ക്ഷേത്രത്തിലേക്ക് പുറപ്പെട്ടു. ഘോഷയാത്രയ്ക്ക് ബാല പ്രചാതിപതി അടികൾ നേതൃത്വം വഹിക്കും.

ഘോഷയാത്ര കോട്ടാർ, ശുചീന്ദ്രം, ഈത്തൻക്കാട് വഴി ഉച്ചയ്ക്ക് സ്വാമി തോപ്പിൽ എത്തിചേരും. അയ്യാ വൈകുണ്ഠസ്വാമി അവതാര ദിനത്തോടനുബന്ധിച്ച് ജില്ലാ കളക്ടർ ശ്രീധർ ഇന്ന് കന്യാകുമാരി ജില്ലയ്ക്ക് പ്രാദേശിക അവധിയും പ്രഖ്യാപിച്ചിട്ടുണ്ട്.

അനിഷ്ട സംഭവങ്ങൾ ഒന്നും ഉണ്ടാവാതിരിക്കാൻ ജില്ലാ പൊലീസ് മേധാവി ഹരി കിരൺ പ്രസാദിന്റെ നേതൃത്യത്തിൽ കനത്ത പൊലീസ് സുരക്ഷയും ഒരുക്കിയിട്ടുണ്ട്.