മൂന്ന് സെക്കന്‍ഡ് കൊണ്ട് പൂജ്യത്തില്‍ നിന്നും 100 കിലോമീറ്റര്‍ വേഗം കൈവരിക്കുന്ന ലംബോര്‍ഗിനിയെ പരിചയപ്പെടാം

വെറും മൂന്ന് സെക്കന്‍ഡ് കൊണ്ട് പൂജ്യത്തില്‍ നിന്നും 100 കിലോമീറ്റര്‍ വേഗം കൈവരിക്കുന്ന ലംബോര്‍ഗിനിയുടെ 'ഹുറാകാന്‍' കുമാരനല്ലൂരിലും എത്തി. ചെറുകര സിറില്‍ ഫിലിപ്പാണ് 4.5 കോടിരൂപയ്ക്ക് ഹുറാകാനിനെ കോട്ടയത്തെത്തിച്ചത്.

7 സ്പീഡ് ഓട്ടോമാറ്റിക് ഗീയര്‍ സംവിധാനമുള്ള കാര്‍ ഫോര്‍ വീല്‍ ഡ്രൈവാണ്. കാര്‍ബണ്‍ ഫൈബര്‍, അലുമിനിയം എന്നിവ ഉപയോഗിച്ചാണ് വാഹനത്തിന്റെ ബോഡി നിര്‍മ്മിച്ചിരിക്കുന്നത്. രണ്ടു പേര്‍ക്കു മാത്രമേ ഇതില്‍ യാത്ര ചെയ്യാന്‍ കഴിയൂ.

ജയ്പൂരിലെ ലംബോര്‍ഗിനി ഷോറൂമില്‍ നിന്നു ട്രക്കിലാണു സിറില്‍ കോട്ടയത്തേക്ക് വാഹനമെത്തിച്ചത്. കോട്ടയം ആര്‍ടി ഓഫിസില്‍ തന്നെയാണ് ഇതിന്റെ റജിസ്‌ട്രേഷനും നടത്തുന്നത്. 80 ലക്ഷം രൂപയാണ് ഹുറാകാനിന് നികുതിയായി നല്‍കേണ്ടത്.

കേരളത്തില്‍ രജിസ്റ്റര്‍ ചെയ്ത രണ്ടാമത്തെ ലംബോര്‍ഗിനിയാണ് സിറിലിന്റെ ഹുറാകാന്‍. യാത്ര ചെയ്യുമ്പോള്‍ 45 മില്ലീമീറ്റര്‍ വരെ കാറിന്റെ ബോഡി ഉയര്‍ത്താന്‍ കഴിയുമെന്നതാണ് ഇതിന്റെ പ്രധാന സവിശേഷത.