Gold Price Today in Kerala | സ്വർണ്ണവിലയിൽ ഇടിവ്; പവന് 200 രൂപ കുറഞ്ഞു

സംസ്ഥാനത്ത് സ്വർണ്ണവില കുറഞ്ഞു, പവന് 200 രൂപ കുറഞ്ഞ് 37,200 രൂപയാണ് ഇന്നത്തെ വില, ഗ്രാമിന് 4,650. രണ്ട് ദിവസം കൊണ്ട് സ്വര്‍ണ്ണവിലയിൽ ആയിരം രൂപയോളം കുറവുണ്ടായി. കഴിഞ്ഞ ദിവസം മാത്രം രണ്ട് തവണയായി 760 രൂപയാണ് കുറഞ്ഞത്.

ഓഗസ്റ്റ് ഏഴിനാണ് എക്കാലത്തെയും ഉയര്‍ന്ന നിലവാരമായ 42,000 രൂപയിലേക്ക് സ്വര്‍ണവിലയെത്തിയത്. മൂന്നുദിവസം തുടര്‍ച്ചയായി ആ നിലവാരത്തില്‍ തുടര്‍ന്നെങ്കിലും തുടര്‍ന്നങ്ങോട്ട് ഘട്ടംഘട്ടമായി താഴോട്ട് പതിക്കുകയായിരുന്നു. ഒന്നരമാസത്തിനിടെ പവന് 4800 രൂപയോളം കുറഞ്ഞിട്ടുണ്ട്.

ഡോളര്‍ കരുത്താര്‍ജിച്ചതും യു.എസ്.-ചൈന ചര്‍ച്ചകളിലെ ശുഭ സൂചനകളും ഓഹരി വിപണികളിലെ നേട്ടവും സാമ്പത്തിക ഉത്തേജന പാക്കേജിന്റെ ഫലം വിവിധ മേഖലകളില്‍ ദൃശ്യമായി തുടങ്ങിയതുമാണ് സ്വര്‍ണ വിലയിലെ ചാഞ്ചാട്ടത്തിനുപിന്നില്‍.

ആഗോളതലത്തില്‍ ഒരു ട്രോയ് ഔണ്‍സ് (31.1 ഗ്രാം) തനിത്തങ്കത്തിന് 200 ഡോളര്‍ വരെ കുറവുവന്നിട്ടുണ്ട്. 2000 ഡോളര്‍ വരെ എത്തിയ സ്വര്‍ണവില ഇപ്പോള്‍ 1902.04 ഡോളര്‍ എന്ന നിലവാരത്തിലാണ്.

അതേസമയം ദേശീയതലത്തിൽ വെള്ളിയുടെ വിലയിലും ഇടിവ് വന്നിട്ടുണ്ട്. വെള്ളി കിലോയ്ക്ക് 6400 രൂപ കുറഞ്ഞ് 60,600 രൂപയിലെത്തി നിൽക്കുകയാണ്.