Nirmala Sitharaman Interview | പ്രധാനമന്ത്രി സൂര്യോദയ യോജനയിലൂടെ ഉപഭോക്തക്കള്‍ക്ക് എന്ത് ലാഭം ? ധനമന്ത്രി പറയുന്നു

അയോധ്യ രാമക്ഷേത്ര പ്രാണ പ്രതിഷ്ഠയ്ക്ക് പിന്നാലെ പ്രധാനമന്ത്രി നരേന്ദ്രമോദി പ്രഖ്യാപിച്ച പദ്ധതിയാണ് പ്രധാനമന്ത്രി സൂര്യോദയ യോജന. രാജ്യത്തെ ഒരു കോടി കുടുംബങ്ങളില്‍ സോളാര്‍ പാനലുകള്‍ സ്ഥാപിക്കുന്ന പദ്ധതിയാണ് ഇത്. 

പദ്ധതി സാധാരണക്കാരുടെ വൈദ്യുതി ബിൽ കുറയ്ക്കുക മാത്രമല്ല, ഊർജ മേഖലയിൽ ഇന്ത്യയെ സ്വയം പര്യാപ്തമാക്കുമെന്നും പ്രധാനമന്ത്രി പറഞ്ഞിരുന്നു.

2024 ഇടക്കാല ബജറ്റ് അവതരണത്തിന് പിന്നാലെ നെറ്റ്‌വർക്ക് 18 മാനേജിംഗ് ഡയറക്ടർ രാഹുൽ ജോഷിയുമായി നടത്തിയ പ്രത്യേക അഭിമുഖത്തില്‍ ധനമന്ത്രി നിര്‍മ്മലാ സീതാരാമന്‍ പദ്ധതിയിലൂടെ ജനങ്ങള്‍ക്ക് ലഭിക്കുന്ന നേട്ടത്തെ കുറിച്ച് സംസാരിച്ചു. 

പദ്ധതിയുടെ ഗുണഭോക്താക്കളായ ഒരു കോടി കുടുംബങ്ങൾക്ക് പ്രതിമാസം 300 യൂണിറ്റ് വരെ സൗജന്യ വൈദ്യുതി ലഭിക്കാന്‍ പദ്ധതി സഹായിക്കും.

ഇതോടൊപ്പം പ്രതിവർഷം ഒരു കുടുംബത്തിന് 18,000 രൂപ വരെ ലാഭിക്കാനും പ്രധാനമന്ത്രി സൂര്യോദയ യോജന പ്രാപ്തമാക്കുമെന്ന് ധനമന്ത്രി നിർമ്മല സീതാരാമൻ പറഞ്ഞു.

 രാജ്യത്തിന്‍റെ സമ്പദ്‌വ്യവസ്ഥയുടെ കരുത്ത് കുറഞ്ഞിട്ടില്ലെന്നും  മതേതരത്വം പ്രവർത്തിയിൽ കൊണ്ടുവന്ന സര്‍ക്കാരാണിതെന്നും ധനമന്ത്രി പറഞ്ഞു. തന്‍റെ തുടർച്ചയായ ആറാം ബജറ്റാണ് നിര്‍മ്മലാ സീതാരാമന്‍ കഴിഞ്ഞ ദിവസം അവതരിപ്പിച്ചത്.