സാംസങ് ഫോണ്‍ കയ്യിൽ ഉണ്ടോ? സുരക്ഷാ മുന്നറിയിപ്പുമായി കേന്ദ്രം

സാംസങ് ഫോണ്‍ ഉപയോക്താക്കള്‍ക്ക് സുരക്ഷാ മുന്നറിയിപ്പ് നല്‍കി കേന്ദ്രസര്‍ക്കാര്‍. രാജ്യത്ത് സൈബര്‍ സുരക്ഷാ ഭീഷണികള്‍ വിലയിരുത്തുന്ന കംപ്യൂട്ടര്‍ എമര്‍ജന്‍സി റെസ്‌പോണ്‍സ് ടീം ഓഫ് ഇന്ത്യ (സിഇആര്‍ടി-ഇഎന്‍)യാണ് മുന്നറിയിപ്പ് നല്‍കിയത്. സാംസങ് ഫോണ്‍ പരമ്പരയിലെ നാല് വേര്‍ഷനുകളെ ബാധിച്ചേക്കാവുന്ന സുരക്ഷാ ഭീഷണിയെപ്പറ്റിയാണ് മുന്നറിയിപ്പ്.

ആന്‍ഡ്രോയ്ഡ് വേര്‍ഷന്‍ 11,12,13,14 എന്നിവ അടിസ്ഥാനമാക്കിയുള്ള സാംസങ് ഫോണുകളെ ബാധിക്കുന്ന സുരക്ഷാ പ്രശ്‌നങ്ങളെപ്പറ്റിയാണ് കേന്ദ്ര മന്ത്രാലയം ചൂണ്ടിക്കാട്ടിയത്.

നിയന്ത്രണങ്ങള്‍ മറികടന്ന് വ്യക്തികളുടെ വിവരങ്ങള്‍ ശേഖരിക്കാനും മറ്റും ഹാക്കര്‍മാരെ സഹായിക്കുന്ന സുരക്ഷാ പ്രശ്‌നങ്ങളെപ്പറ്റിയാണ് സര്‍ക്കാര്‍ സൂചന നൽകിയിരിക്കുന്നത്.

സാംസങ് ഫോണുകളിലെ സുരക്ഷാ സംവിധാനമായ നോക്‌സ് (knox) ഫീച്ചറിലേക്കുള്ള നിയമവിരുദ്ധ ആക്‌സസ്, ഫേഷ്യല്‍ റെക്കഗ്നിഷന്‍ സോഫ്റ്റ് വെയറിലെ പ്രശ്‌നങ്ങള്‍, എആര്‍ ഇമോജി ആപ്പിലെ പ്രശ്‌നങ്ങള്‍ എന്നിവയാണ് ഈ ഫോണുകള്‍ ഇപ്പോള്‍ നേരിടുന്ന പ്രധാന വെല്ലുവിളികളെന്നും സര്‍ക്കാര്‍ അറിയിച്ചു.

എന്താണ് പരിഹാരം? - സാംസങ് 11, 12,13, 14 വേര്‍ഷന്‍ ഉപയോഗിക്കുന്നവര്‍ എത്രയും പെട്ടെന്ന് സെക്യൂരിറ്റി സോഫ്റ്റ് വെയര്‍ അപ്‌ഡേറ്റുകള്‍ ചെയ്യണം. ഇതിലൂടെ ഫോണ്‍ സുരക്ഷിതമാക്കാന്‍ സാധിക്കുമെന്ന് സര്‍ക്കാര്‍ വൃത്തങ്ങള്‍ അറിയിച്ചു.