ദേശീയ ജൂനിയര്‍ വനിതാ ഹോക്കി: കായിക താരങ്ങള്‍ക്ക് സദ്യയൊരുക്കി സംഘാടകര്‍

ദേശീയ ജൂനിയര്‍ വനിതാ ഹോക്കി ചാമ്പ്യന്‍ഷിപ്പ് എ ഡിവിഷനില്‍ പങ്കെടുക്കുന്ന കായിക താരങ്ങള്‍ക്കു വേണ്ടി കേരളത്തിന്റെ തനതു വിഭവങ്ങള്‍ ഉള്‍പ്പെടുത്തി ഉച്ചസദ്യ

ഉപ്പേരി മുതല്‍ പായസം വരെ വിളമ്പിയ സദ്യ അന്യസംസ്ഥാനങ്ങളില്‍ നിന്നെത്തിയ കായിക താരങ്ങളുടെയും ഒഫീഷ്യലുകളുടെയും രസമുകുളങ്ങള്‍ക്കു പുതിയ അനുഭവമായി.

കൈ ഉപയോഗിച്ച് കഴിക്കാന്‍ കഴിയാത്തവര്‍ സ്പൂണിന്റെ അഭയം തേടി. എല്ലാ വിഭവങ്ങളും ആസ്വദിച്ചതോടൊപ്പം പുതിയ രുചികൂട്ടുകള്‍ പരിചയപെട്ടതിന്റെ സന്തോഷവും എല്ലാവരുടെയും മുഖത്തു കാണാമായിരുന്നു. പായസം വിളമ്പിയപ്പോള്‍ എന്താണ് സാധനമെന്നു അറിയാതെ പലരും പരസ്പ്പരം നോക്കി.

മധുരമുള്ള വിഭവം ആണെന്നറിഞ്ഞു രുചിച്ചു നോക്കിയ പലരും വീണ്ടും വാങ്ങിച്ചു. ചിലര്‍ ചോറിനോടൊപ്പം പായസവും കഴിച്ചു നല്ലതെന്ന അഭിപ്രായം പങ്കുവെച്ചു

ഭൂരിഭാഗം പേരും സദ്യ ആദ്യമായി രുചിക്കുന്നവരാണ്. ചിലര്‍ ഇലയില്‍ വിളമ്പിയ വിഭവങ്ങളോടൊപ്പം സെല്‍ഫി എടുത്തു

ടൂര്‍ണമെന്റിലെ ഭക്ഷണ മെനുവില്‍ ഉത്തരേന്ത്യന്‍ വിഭവങ്ങള്‍ മാത്രം രുചിച്ച താരങ്ങള്‍ക്കും ടീം അധികൃതര്‍ക്കും അവിയലും പുളിശ്ശേരിയും കിച്ചടിയും ചേര്‍ന്ന സദ്യ വട്ടം വേറിട്ട അനുഭവമായി