മാവേലിക്കരയിൽ മദ്യപിച്ച് അവശനായ നിലയിൽ പോലീസ് വാഹനം ഓടിച്ച ഉദ്യോഗസ്ഥൻ പിടിയിൽ

മാന്നാർ സ്റ്റേഷനിലെ ഔദ്യോഗിക വാഹനവുമായി കായംകുളം ഭാഗത്തേക്ക് വന്ന ഉദ്യോഗസ്ഥൻ അതിവേഗത്തിലും നിയന്ത്രണമില്ലാതെയുമാണ് വാഹനം ഓടിച്ചിരുന്നത്. റോഡിലെ മറ്റ് യാത്രക്കാരെയും വാഹനങ്ങളെയും അപകടത്തിലാക്കുന്ന വിധത്തിലായിരുന്നു പോലീസിന്റെ ഈ അഭ്യാസപ്രകടനം.

തുടർച്ചയായി അപകടകരമായ രീതിയിൽ മുന്നോട്ട് നീങ്ങിയ വാഹനം, ഡ്രൈവർക്ക് ബോധം മറയുന്ന അവസ്ഥയായതോടെ റോഡരികിൽ നിർത്തുകയായിരുന്നു. വാഹനത്തിനുള്ളിൽ തന്നെ മദ്യപിച്ച് ഛർദിച്ച് അവശനായ നിലയിലായിരുന്നു ഉദ്യോഗസ്ഥൻ. നാട്ടുകാർ അറിയിച്ചതിനെ തുടർന്ന് കൂടുതൽ പോലീസ് ഉദ്യോഗസ്ഥർ സ്ഥലത്തെത്തിയാണ് ഇയാളെ മാറ്റിയത്. ഉദ്യോഗസ്ഥനെതിരെ കടുത്ത അച്ചടക്ക നടപടിയുണ്ടാകുമെന്നാണ് സൂചന. ഇയാളെ വൈദ്യപരിശോധനയ്ക്ക് വിധേയനാക്കി.