'രാമന്റെ സീതയായി'; ഗുരുവിന്റെ ജന്മദിനത്തിന് അയോധ്യയിൽ രാമായണം അവതരിപ്പിച്ച് ഹേമ മാലിനി

അയോധ്യയിലെ ശ്രീരാമക്ഷേത്ര പ്രാണപ്രതിഷ്ഠാ ചടങ്ങിന് മുന്നോടിയായി രാമായണ നൃത്തത്തിന് ചുവട് വയ്ക്കാനായ സന്തോഷം പങ്കുവെച്ച് നടിയും ബിജെപി എംപിയുമായ ഹേമ മാലിനി.

ശ്രീരാമഭദ്രാചാര്യയുടെ 75-ാം ജന്മദിനത്തിൽ അദ്ദേഹത്തോടുള്ള ആദരസൂചകമായി നടത്തിയ ബാലെയിൽ രാമായണം അവതരിപ്പിക്കാനുള്ള ഭാഗ്യം എനിക്കുണ്ടായി എന്ന് താരം സമൂഹമാധ്യമത്തിൽ കുറിച്ചു.

'തുളസി പീതാദീശ്വർ (ചിത്രകൂട് ജഗത് ഗുരു) ശ്രീ റാംഭദ്രാചാര്യ ജി തന്റെ 75-ാം ജന്മദിനം ജനുവരി 17 ന് അയോധ്യയിൽ അമൃത് മഹോത്സവമായി ആഘോഷിച്ചു. രാമായണം അവതരിപ്പിക്കാനുള്ള ഭാഗ്യം എനിക്കുണ്ടായി, അതിൽ രാമന്റെ സീതയുടെ വേഷം ഞാൻ അവതരിപ്പിച്ചു', ഹേമ കുറിച്ചു.

ന്യത്തത്തിന്റെ ചിത്രങ്ങളും താരം പങ്കുവെച്ചു. സീത എന്ന കഥാപാത്രത്തെയാണ് ഹേമ അവതരിപ്പിച്ചത്. ഓറഞ്ചും ചുവപ്പും കലർന്ന വസ്ത്രവും പരമ്പരാഗത ആഭരണങ്ങളും അണിഞ്ഞ് പരമ്പരാഗത മേളത്തോടെയായിരുന്നു നൃത്തം.

അയോധ്യയിൽ വീണ്ടും ഹേമയുടെ രാമായണ നൃത്തം അരങ്ങേറും.  ജനുവരി 22 ന് അയോധ്യയിലെ രാമക്ഷേത്ര ഉദ്ഘാടന വേളയിൽ രാമായണ നൃത്തം നടത്തുമെന്നാണ് റിപ്പോർട്ടുകൾ.

വിവിധ മേഖലകളിലെ പ്രമുഖർ പങ്കെടുക്കുന്ന പരിപാടി പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യും. 2024 ജനുവരി 22 ന് നടക്കുന്ന പ്രതിഷ്ഠാ ചടങ്ങിന് ശേഷം അയോധ്യ ക്ഷേത്രത്തിൽ രാം ലല്ലയുടെ വിഗ്രഹം സ്ഥാപിക്കും.

8,000 ഓളം പ്രമുഖ വ്യക്തികൾ ചടങ്ങിൽ പങ്കെടുക്കുമെന്നാണ് പ്രതീക്ഷിക്കുന്നത്.