IPL: ധോണി ആരാധകരെ ആഹ്ളാദിപ്പിൻ; 'അൺക്യാപ്ഡ്' നിയമം തിരികെ വരുന്നു; ചെറിയ തുക മുടക്കി ചെന്നൈയ്ക്ക് താരത്തെ ടീമിൽ നിലനിര്‍ത്താം

ഇന്ത്യൻ പ്രീമിയർ ലീഗിൻ്റെ  (ഐപിഎൽ) 2025 പതിപ്പിന് മുന്നോടിയായി, രാജ്യാന്തര ക്രിക്കറ്റില്‍ നിന്ന് വിരമിച്ച കളിക്കാരെ അഞ്ച് വർഷത്തേക്ക് അൺകാപ്പ്ഡ് വിഭാഗത്തില്‍ ഉൾപ്പെടുത്തുന്ന നിയമം തിരികെ കൊണ്ടുവരാൻ ബിസിസിഐ ഒരുങ്ങുന്നതായി റിപ്പോർട്ട്.  (Picture Credit: BCCI)

ഐപിഎൽ ആദ്യ സീസൺ മുതൽ നിലനിന്നിരുന്ന നിയമം, ആരും ഉപയോഗിക്കാത്തതിനാൽ 2021ല്‍ ഒഴിവാക്കുകയായിരുന്നു. ഐപിഎൽ ഫ്രാഞ്ചൈസി ഉടമകളും ബിസിസിഐയും തമ്മിൽ കഴിഞ്ഞ മാസം നടന്ന കൂടിക്കാഴ്ചയിൽ ചെന്നൈ സൂപ്പർ കിംഗ്‌സ് (സിഎസ്‌കെ) മാനേജ്‌മെന്റ് ഈ നിയമം തിരികെ  കൊണ്ടുവരാൻ സമ്മർദ്ദം ചെലുത്തിയതോടെയാണ് ഇതു വീണ്ടും ചർച്ചയായത്.  (Photo by Deepak Malik / Sportzpics for IPL)

എന്നാൽ,  ജൂലൈ 31 ന് നടന്ന കൂടിക്കാഴ്ചയിൽ മറ്റ് ഫ്രാഞ്ചൈസികളിൽ നിന്ന് സിഎസ്‌കെയുടെ നിർദ്ദേശത്തിന് കാര്യമായ പിന്തുണ ലഭിച്ചില്ലെന്നാണ് വിവരം. എന്നാൽ ഈ നിയമം തിരികെ കൊണ്ടുവരാൻ ഇന്ത്യൻ ക്രിക്കറ്റ് ബോർഡ് ഒരുങ്ങുന്നുവെന്നാണ് ഏറ്റവും പുതിയ റിപ്പോർട്ട്. 

നിയമം തിരികെ വരുന്നതോടെ മുൻ ഇന്ത്യൻ ക്യാപ്റ്റൻ എം എസ് ധോണിയെ ഒരു അൺക്യാപ്പ്ഡ് കളിക്കാരനായി നിലനിർത്താൻ സിഎസ്‌കെയെ അനുവദിക്കുകയും താരലേലത്തിൽ കൂടുതൽ തുക ചെലവിടാൻ സാധിക്കുകയും ചെയ്യും. 

'നിയമം തിരികെ വരാനുള്ള സാധ്യതയേറെയാണ്. കഴിഞ്ഞ മാസം നടന്ന മീറ്റിംഗിൽ ഇത് വിശദമായി ചർച്ച ചെയ്തു. കളിക്കാരുടെ നിയന്ത്രണങ്ങൾ സംബന്ധിച്ച പ്രഖ്യാപനങ്ങൾ വരുമ്പോൾ ഇതു സംബന്ധിച്ച് കൂടുതൽ വ്യക്തത വരും'-  ഉന്നതവൃത്തങ്ങൾ വെളിപ്പെടുത്തി.  

നിയമം തിരിച്ചുവന്നാല്‍ 4 കോടി രൂപക്ക് ധോണിയെ ചെന്നൈയ്ക്ക് നിലനിർത്താൻ സാധിക്കും. 2022ലെ മെഗാ ലേലത്തിന് മുന്നോടിയായി 12 കോടി രൂപയ്ക്കാണ് ധോണിയെ സിഎസ്‌കെ നിലനിർത്തിയത്. 

ഐപിഎൽ 2024 ആരംഭിക്കുന്നതിന് മുമ്പ് ക്യാപ്റ്റൻസി റുതുരാജ് ഗെയ്‌ക്‌വാദിന് കൈമാറിയ ധോണി സീസൺ മുഴുവൻ കളിച്ചു. 220.55 സ്‌ട്രൈക്ക് റേറ്റിൽ 161 റൺസാണ് താരം നേടിയത്. പലകളികളിലും ഏറെ പന്തുകൾ ബാക്കിയില്ലാത്ത അവസരങ്ങളിലാണ് ധോണി ക്രീസിലേക്കെത്തിയത്.

അധികം പന്തുകൾ ശേഷിക്കാതിരുന്നപ്പോൾ അദ്ദേഹം പൊതുവെ ബാറ്റ് ചെയ്യാൻ ഇറങ്ങുമായിരുന്നു, എന്നാൽ നേരിട്ട 73 പന്തുകളിൽ നന്നായി റണ്‍സ് നേടാൻ ധോണിക്ക് കഴിഞ്ഞിരുന്നു.