Mike Tyson| 19 വർഷത്തിനുശേഷം റിങ്ങിലേക്കുള്ള തിരിച്ചുവരവിൽ ബോക്‌സിങ് ഇതിഹാസം മൈക്ക് ടൈസണ് തോൽവി

ടെക്‌സാസ്: നീണ്ട 19 വര്‍ഷത്തെ ഇടവേളയ്ക്കു ശേഷം ബോക്‌സിങ് റിങ്ങിലേക്ക് മടങ്ങിയെത്തിയ ഇതിഹാസതാരം മൈക്ക് ടൈസണ് തോല്‍വി. ബോക്സിങ് താരമായി മാറിയ പഴയ യൂട്യൂബര്‍ 27കാരനായ ജേക്ക് പോളിനോടായിരുന്നു 58കാരനായ ടൈസന്റെ തോല്‍വി. ഏകകണ്ഠമായ തീരുമാനത്തിലൂടെയാണ് ജേക്കിനെ വിജയിയായി (78-73) പ്രഖ്യാപിച്ചത്. ടൈസന്റെ കരിയറിലെ ഏഴാം തോൽവിയാണിത്. (Photo: AP)

ടെക്‌സാസിലെ ആര്‍ലിങ്ടണിലെ എ ടി ആന്‍ഡ് ടി സ്റ്റേഡിയത്തില്‍ നടന്ന മത്സരത്തില്‍ പ്രായത്തിന്റേതായ അവശതകള്‍ ടൈസണെ ബാധിച്ചിരുന്നു. അദ്ദേഹത്തിന്റെ റിഫ്‌ളക്‌സുകളെല്ലാം മന്ദഗതിയിലായിരുന്നു. (Photo: AP)

ആദ്യ രണ്ട് റൗണ്ടിലും മികച്ച പ്രകടനം നടത്താന്‍ ടൈസണ് കഴിഞ്ഞു. ഒടുവില്‍ എട്ടു റൗണ്ടുകള്‍ പൂര്‍ത്തിയായപ്പോള്‍ ജേക്കിനെ വിജയിയായി തിരഞ്ഞെടുക്കുകയായിരുന്നു. മത്സരം നെറ്റ്ഫ്‌ളിക്‌സ് തത്സമയം സംപ്രേക്ഷണം ചെയ്തിരുന്നു. (Photo: AP)

മത്സരത്തിന് മുന്നോടിയായി കഴിഞ്ഞ ദിവസം ടൈസണും ജേക്കും വേദിയില്‍ മുഖാമുഖം എത്തിയിരുന്നു. ടൈസണ്‍ വലംകൈ കൊണ്ട് ജേക്കിന്റെ മുഖത്ത് ചെറുതായി ഒന്നടിച്ചതോടെ രംഗം കൊഴുത്തുവന്നെങ്കിലും സുരക്ഷാ ജീവനക്കാര്‍ ഇരുവരെയും തല്‍ക്ഷണം പിടിച്ചുമാറ്റി. (Photo: AP)

അതേസമയം, ബോക്‌സിങ് റിങ്ങില്‍ ടൈസണോട് ബഹുമാനപൂര്‍വമായ സമീപനമാണ് ജേക്ക് സ്വീകരിച്ചത്. 2005ലായിരുന്നു ടൈസന്റെ അവസാന പ്രൊഫഷണല്‍ പേരാട്ടം. (Photo: AP)

2020ല്‍ ഒരു പ്രദര്‍ശന മത്സരത്തില്‍ റോയ് ജോണ്‍സിനെതിരെയും ടൈസൺ കളത്തിലിറങ്ങിയിരുന്നു. പ്രൊഫഷണല്‍ മത്സരത്തിലിറങ്ങാന്‍ ഏറെ നാളായി ആലോചിച്ചുവരുന്നുണ്ടെങ്കിലും അനാരോഗ്യം വെല്ലുവിളിയുയർത്തി. (Photo: AP)

വയറിലെ അള്‍സറായിരുന്നു ടൈസൺ ഏറെക്കാലമായി അലട്ടുന്നത്. ഇതുകാരണം ജൂലൈയില്‍ നടക്കേണ്ടിയിരുന്ന മത്സരം നീട്ടിവെക്കുകയാണുണ്ടായത്. പിന്നീട് 26 പൗണ്ട് ശരീരഭാരം കുറച്ച ടൈസന്‍ ഏതാനും ആഴ്ചകള്‍ക്ക് മുന്‍പാണ് മെഡിക്കല്‍ ക്ലിയറന്‍സ് സ്വന്തമാക്കിയത്. (Photo: AP)