നാലാം സ്ഥാനത്തിനായി പോരാട്ടം; ബാംഗ്ലൂരിനും മുംബൈക്കും നിർണായക മത്സരം; കണക്കുക്കൂട്ടലുകളിൽ രാജസ്ഥാൻ

ഐപിഎല്ലിൽ മുംബൈക്കും ബാംഗ്ലൂരിനും നിർണായക മത്സരം. ഇന്ന് വൈകീട്ട് 3:30നു നടക്കുന്ന ആദ്യ മത്സരത്തിൽ മുംബൈ ഇന്ത്യൻസ് സൺറൈസേഴ്‌സ് ഹൈദെരാബാദിനെ നേരിടും. രാത്രി 7:30ന് നടക്കുന്ന മത്സരത്തിൽ റോയൽ ചലഞ്ചേഴ്‌സ് ബാംഗ്ലൂർ ഗുജറാത്ത് ടൈറ്റൻസിനെ നേരിടും.

ഇന്ന് തോറ്റാൽ ഐപിഎല്ലിൽ അഞ്ച് കിരീടങ്ങൾ നേടിയ മുംബൈ ടൂർണമെന്റിൽ നിന്നും പുറത്താകും. പക്ഷെ, ജയം മാത്രം പോരാ മുംബൈക്ക്, രണ്ടാം മത്സരത്തിൽ ബാംഗ്ലൂർ പരാജയപ്പെടുക കൂടി ചെയ്താലേ മുംബൈക്ക് സാധ്യതകൾ തുറക്കൂ.

ബാംഗ്ലൂരിന് പ്ലേഓഫ് ഉറപ്പിക്കണമെങ്കിൽ ഗുജറാത്തിനെതിരായ മത്സരത്തിൽ വിജയം അനിവാര്യമാണ്. ആദ്യം പ്ലേഓഫ് ഉറപ്പിക്കുകയും പോയിൻ‌റ് ടേബിളിലെ ടോപ്പർമാരുമായ ശക്തരായ ഗുജറാത്തനെതിരെ വിജയം നേടുകയെന്നത് അനായാസമാകില്ല.

സ്വന്തം മൈതാനത്ത് നടക്കുന്ന മത്സരത്തിൽ നായകൻ ഫാഫ് ഡുപ്ലെസിയുടെയും വിരാട് കോഹ്ലിയുടെയും ഗ്ലെൻ മാക്‌സ്‌വെല്ലിൻറെയും വെടിക്കെട്ട് ബാറ്റിങ്ങാണ് ബാംഗ്ലൂരിന്റെ ശക്തി. കഴിഞ്ഞ മത്സരത്തിൽ സെഞ്ച്വറി നേടിയ കോഹ്ലി തകർപ്പൻ ഫോമിലാണുള്ളത്.

ഗുജറാത്തിന്റെ മികച്ച ഫോമിലുള്ള ശുഭ്മാൻ ഗില്ലും ഡേവിഡ് മില്ലറും റാഷിദ് ഖാനും രാഹുൽ തെവാത്തിയയും അടങ്ങുന്ന നിരയെ കീഴടക്കുകയെന്നത് ബാംഗ്ലൂരിന് പ്രയാസമാകും.

അതേസമയം ഇന്നത്തെ മത്സരത്തിലെ ഫലങ്ങളെ ആശ്രയിച്ചായിരിക്കും രാജസ്ഥാന്റെ പ്ലേ ഓഫിലേക്കുള്ള പ്രതീക്ഷകൾ. മുംബൈ ജയിക്കുന്നതോടെ ആ പ്രതീക്ഷ അവസാനിക്കും. ഇനി മുംബൈ പരാജയപ്പെട്ടാൽ, ഗുജറാത്തിനെതിരെ ബാംഗ്ലൂരിന്റെ പരാജയത്തിനു അവർ കാത്തിരിക്കണം.