Khelo India Youth Games 2023| അഞ്ച് സ്വർണം, രണ്ട് വെള്ളി മെഡലുകൾ; ഖേലോ ഇന്ത്യയിൽ തിളങ്ങി മാധവന്റെ മകൻ വേദാന്ത്

ഖേലോ ഇന്ത്യയിൽ തിളങ്ങി നടൻ മാധവന്റെ മകൻ വേദാന്ത്. ഏഴ് മെഡലുകളാണ് നീന്തലിൽ വേദാന്ത് സ്വന്തമാക്കിയത്.

മകന്റെ മെഡൽ നേട്ടം മാധവൻ സോഷ്യൽമീഡിയിയിലൂടെ അറിയിച്ചിട്ടുണ്ട്. വേദാന്തിനൊപ്പം മെഡൽ നേടിയ മറ്റ് താരങ്ങളേയും താരം അഭിനന്ദിച്ചു.

അഞ്ച് ഗോൾഡ് മെഡലും രണ്ട് സിൽവർ മെഡലുകളുമടക്കം ഏഴ് മെഡലുകളാണ് നീന്തൽ മത്സരങ്ങളിൽ വേദാന്ത് നേടിയത്. നീന്തലിൽ നൂറ് മീറ്റർ, 200 മീറ്റർ ഇനങ്ങളിലാണ് വേദാന്തിന്റെ സ്വർണനേട്ടം.

1500 മീറ്റർ, 400 മീറ്റർ, 800 മീറ്റർ ഇനങ്ങളിൽ വെള്ളി മെഡലുകളും യുവ നീന്തൽ താരം സ്വന്തമാക്കി. ഖേലോ ഇന്ത്യയിൽ 161 മെഡലുകളുമായി ഒന്നാം സ്ഥാനത്തെത്തിയ മഹാരാഷ്ട്രയേയും മാധവൻ അഭിനന്ദിച്ചു.

56 സ്വർണം, 55 വെള്ളി, 50 വെങ്കലം എന്നിങ്ങനെയാണ് ഗെയിമിൽ മഹാരാഷ്ട്രയുടെ താരങ്ങൾ നേടിയത്. നീന്തലിൽ മഹാരാഷ്ട്രയെ പ്രതിനിധീകരിച്ചാണ് വേദാന്ത് മത്സരിച്ചത്.

നീന്തലിൽ മകന് വിദഗ്ധ പരിശിലീനം ലഭിക്കാൻ രണ്ട് വർഷങ്ങൾക്ക് മുമ്പ് മാധവൻ കുടുംബ സമേതം ദുബായിലേക്ക് താമസം മാറിയിരുന്നു.

അടുത്ത ഒളിമ്പിക്സാണ് വേദാന്തിന്റെ ലക്ഷ്യം. ഇന്ത്യയ്ക്കു വേണ്ടി വേദാന്ത് ഒളിമ്പിക് മെഡൽ നേടുന്നതിനായി കാത്തിരിക്കുകയാണ് മാധവന്റെ ആരാധകർ.